កសិដ្ឋានចិញ្ចឹមកង្កែបមាគ៌ាជលសា អាចផ្គត់ផ្គង់តម្រូវការទីផ្សារក្នុងស្រុកបានជាង ៨តោន ក្នុងមួយខែ

កសិដ្ឋានចិញ្ចឹមកង្កែបមាគ៌ាជលសា ដែលស្ថិតនៅភូមិដុំ ឃុំពានរោង ស្រុកស្វាយអន្ទរ ខេត្តព្រៃវែង  អាចផ្គត់ផ្គង់តម្រូវការទីផ្សារក្នុងស្រុកបានជាង ៨តោន ក្នុងមួយខែ។

លោក រី វុទ្ធី អាយុ៣៦ឆ្នាំ ជាម្ចាស់កសិដ្ឋានមាគ៌ាជលសា បានប្រាប់ កម្ពុជាថ្មី ថា សម្រាប់ពេលបច្ចុប្បន្ននេះ កសិដ្ឋានមាគ៌ាជលសារបស់លោក អាច​ចិញ្ចឹមនិងផ្គត់ផ្គង់តម្រូវការទីផ្សារសាច់កង្កែបបានចន្លោះពី ៧ ទៅ ៨តោន ក្នុងមួយខែ នៃទំហំផ្ទៃដីសរុបជាង៣ហិកតា ក្នុងស្រុកកំណើតរបស់លោកផ្ទាល់។

លោក បន្តថា ប្រសិនបើក្រឡេកទៅមើលការចិញ្ចឹមដំបូងកាលពីឆ្នាំ ២០១៦ កសិដ្ឋានរបស់លោកអាចមានលទ្ធភាពចិញ្ចឹមកង្កែប និងផ្គត់ផ្គង់តម្រូវការទីផ្សារបានត្រឹមតែ ចន្លោះពី ៣តោន ទៅ ៤តោន តែប៉ុណ្ណោះ ពោលគឺអាចថាខុសគ្នារហូតទៅដល់ពាក់កណ្ដាលជាមួយនឹងពេលបច្ចុប្បន្ននេះ។

វុទ្ធី បានប្រាប់ឱ្យដឹងទៀតថា ទីផ្សារកង្កែបក្នុងស្រុកនាពេល​បច្ចុប្បន្ននេះ កំពុងតែមានតម្រូវការខ្ពស់ ខណៈដែរការផ្គត់ផ្គង់ហាក់នៅមិនទាន់អាចឆ្លើយតបបានគ្រាប់គ្រាន់នៅឡើយ។ សម្រាប់ការចិញ្ចឹមកង្កែបក្នុងកសិដ្ឋានរបស់លោក លោកបានបែងចែកវាជា២ដំណាក់កាល៖ ដំណាក់កាលទី១. ការបង្កាត់ពូជភ្ញាស់ សម្រាប់លក់  ដំណាក់កាលទី២. ការចិញ្ចឹមយកសាច់សម្រាប់ផ្គត់ផ្គង់ទីផ្សារប្រចាំខែ។

ចំពោះតម្លៃកង្កែបសាច់ក្នុងទីផ្សារវិញ វុទ្ធីអាចលក់ចេញបានក្នុងមួយគីឡូក្រាម ចន្លោះពី ៦០០០ រៀល ទៅ ៧០០០រៀល តាមខ្នាតនីមួយៗរបស់កង្កែប ឬពេលខ្លះទៀតតម្លៃអាចធ្លាក់ចុះជាងនេះបន្ដិចទៅតាមតម្រូវការប្រចាំថ្ងៃ។

វុទ្ធី បានបញ្ជាក់ទៀតថា ក្រៅពីរបរចិញ្ចឹមកង្កែប កសិដ្ឋានមាគ៌ាជលសារបស់លោក ក៏មានការបង្កាត់ពូជត្រី និងការចិញ្ចឹមត្រីប្រា បោះដុំទៅទីផ្សាររាជធានីភ្នំពេញ។ ជាគោលដៅសម្រាប់ថ្ងៃខាងមុខ ម្ចាស់កសិដ្ឋានរូបនេះ ក៏គ្រោងនឹងពង្រីកទំហំកសិដ្ឋានឱ្យកាន់តែធំជាងនេះ ដោយដាក់ផែនការរំពឹងខ្ពស់ថានឹងអាចចិញ្ចឹមកង្កែបសម្រាប់ផ្គត់ផ្គង់ទីផ្សារបានចំនួន ៣០តោន​ ក្នុងមួយខែ ដើម្បីងាយស្រួលឆ្លើយតបទៅនឹងតម្រូវការទីផ្សារនាពេល​បច្ចុប្បន្ននេះ ផងដែរ៕

អត្ថបទ ៖ សួស សិត