ព័ត៌មានអន្ដរជាតិ

ថៃសម្លឹងបង្កើនការបញ្ជូនកម្មករទៅសិង្ហបុរី

បានផុស

៤ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

កាសែតបាងកកប៉ុស្តិ៍ បានចុះផ្សាយដោយស្រង់សម្តីរដ្ឋមន្ត្រីក្រសួងការងារថៃ លោក Phiphat Ratchakitprakarn ដែលបានថ្លែងកាលពីថ្ងៃអាទិត្យថា សិង្ហបុរីកំពុងស្វែងរកអ្នកផ្សារដែកក្នុងវិស័យផលិត/ជួសជុលនាវា កម្មករជំនាញផ្នែកអេឡិចត្រូនិច និងកម្មករសំណង់ដែលមានបទពិសោធន៍ ហើយតម្រូវការការងារដ៏ច្រើននេះបង្ហាញពីឱកាសដ៏ល្អសម្រាប់ប្រទេសថៃក្នុងការបញ្ជូនពលករទៅទីនោះបន្ថែមទៀត។

ការថ្លែងឱ្យដឹងយ៉ាងដូច្នេះ ធ្វើឡើងក្រោយមន្រ្តីថៃ បានជួបពិភាក្សាជាមួយការិយាល័យការងារសិង្ហបុរី និងអ្នកជំនួញសិង្ហបុរី ដោយរំពឹងថានឹងបើកផ្លូវសម្រាប់ឱកាសការងារកាន់តែទូលំទូលាយ និងសម្រួលដល់ទីផ្សារការងារក្នុងប្រទេសសិង្ហបុរី។

លោករដ្ឋមន្រ្តីដដែល បានបន្តថា៖ «ជនជាតិថៃអាចមកធ្វើការនៅប្រទេសសិង្ហបុរីបាន ព្រោះការងារនឹងជួយអភិវឌ្ឍជំនាញ ហើយរកប្រាក់ផ្គត់ផ្គង់គ្រួសាររបស់ពួកគេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរគូសបញ្ជាក់ថា ការជំរុញការបញ្ជូនកម្លាំងពលកម្ម គឺស្របទៅតាមយុទ្ធសាស្ត្រសំខាន់របស់ក្រសួងការងារ ក្នុងការលើកកម្ពស់ជំនាញរបស់ពលករថៃ តាមរយៈការងារនៅបរទេស និងបង្កើតប្រាក់ចំណូលសម្រាប់គ្រួសារនៅឯស្រុករបស់ពួកគេ។

បច្ចុប្បន្ននេះ ពលករថៃប្រមាណ ៤ ០០០ នាក់ កំពុងធ្វើការនៅក្នុងប្រទេសសិង្ហបុរី ដោយកាន់តួនាទីផ្សេងៗក្នុងវិស័យសំណង់ ការផលិត ការផ្សារដែក អ្នកបម្រើលើយន្តហោះ ការផលិតគ្រឿងបន្លាស់អេឡិចត្រូនិច ការដំឡើងបំពង់ទុយោរ និងមុខតំណែងការងារផ្សេងៗទៀត។ នេះបើតាមការរាយការណ៍របស់សារព័ត៌មានថៃ The Thaiger៕