ព័ត៌មានអន្ដរជាតិ

រដ្ឋមន្រ្តីថៃ៖ ថៃនឹងទទួលផលចំណេញពីសង្រ្គាមពាណិជ្ជកម្មអាមេរិក-ចិន

បានផុស

៤ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បានថ្លែងនៅថ្ងៃព្រហស្បតិ៍ថា សេដ្ឋកិច្ចរបស់ប្រទេសថៃនឹងទទួលបានផលចំណេញពីសង្គ្រាមពាណិជ្ជកម្មរវាងសហរដ្ឋអាមេរិក និងចិន ដោយព្រោះមានទំនាក់ទំនងល្អជាមួយមហាអំណាចសេដ្ឋកិច្ចទាំង២ ហើយនឹងមិនចាំបាច់បែងចែកបក្សពួកក្នុងជម្លោះនោះទេ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងរបស់រដ្ឋមន្រ្តីថៃរូបនេះ ធ្វើឡើងក្រោយលោក ដូណាល់ ត្រាំ បានជាប់ឆ្នោតក្លាយជាប្រធានាធិបតីអាមេរិកសារជាថ្មី ដោយបង្កើនក្ដីរំពឹងទុកពីភាពតានតឹងកាន់តែខ្លាំងនៃជម្លោះពាណិជ្ជកម្មជាមួយចិន ជាមួយនឹងគោលនយោបាយបង្កើនពន្ធរបស់លោក។

លោក Pichai បានប្រាប់អ្នកយកព័ត៌មានថា ក្នុងសង្គ្រាមពាណិជ្ជកម្ម ការនាំចូលទំនិញរបស់អាមេរិកនឹងធ្លាក់ចុះ ហើយផលិតផលដែលនាំចេញពីថៃគួរតែជាជម្រើសជំនួស ដែលមានន័យថាការនាំចេញរបស់ថៃទៅកាន់សហរដ្ឋអាមេរិក នឹងកើនឡើង។

លោកគូសបញ្ជាក់ថា៖ «យើងមានតុល្យភាពល្អរវាងសហរដ្ឋអាមេរិក និងចិន។ អាមេរិកាំងស្រឡាញ់យើង ចិនស្រឡាញ់យើង យើងមិនចាំបាច់ជ្រើសរើសភាគីទេ»។ លោកបន្ថែមថា គណៈប្រតិភូធុរកិច្ចអាមេរិក នឹងមកធ្វើទស្សនកិច្ចនៅប្រទេសថៃក្នុងខែវិច្ឆិកានេះ ដោយសង្ឃឹមនាំមកជាមួយនូវការវិនិយោគបន្ថែមទៀតពីសហរដ្ឋអាមេរិក។

ទោះបីជាយ៉ាងណាក៏ដោយ សេដ្ឋវិទូថៃនាពេលកន្លងមក បានព្រមានឱ្យរដ្ឋាភិបាលថៃបង្កើនការប្រុងប្រយ័ត្នសម្រាប់ការវិលត្រឡប់ទៅកាន់អំណាចវិញរបស់លោក ត្រាំ ដោយសារតែវានឹងបង្កជាផលវិបាកសម្រាប់ថៃ។ នៅពេលដែលភាពតានតឹងពាណិជ្ជកម្មអាមេរិក-ចិនកើនឡើង ថៃអាចនឹងក្លាយជាប្រទេសផលិតកម្មជំនួសសម្រាប់ក្រុមហ៊ុនចិន ដែលនេះជាប្រយោជន៍ ខណៈតម្រូវការទំនិញពីថៃរបស់អាមេរិកក៏អាចនឹងកើនឡើងដូចគ្នា។

ប៉ុន្តែគោលនយោបាយការពារនិយមរបស់ ត្រាំ គឺជាអ្វីដែលថៃត្រូវប្រុងប្រយ័ត្ន ជាពិសេសការដំឡើងពន្ធ ១០-២០ ភាគរយ ដែលនេះអាចជះឥទ្ធិពលលើការនាំចេញរបស់ថៃ។ ជាមួយគ្នានោះ លោក ត្រាំ មានទំនោរចង់ឱ្យក្រុមហ៊ុនអាមេរិកដាក់រោងចក្រផលិតកម្មក្នុងស្រុករបស់ខ្លួន ដែលវាអាចនឹងប៉ះពាល់ដល់ការវិនិយោគរបស់ក្រុមហ៊ុនអាមេរិកនៅក្នុងស្រុកថៃ។ លើសពីនេះ ថៃអាចក្លាយជាទីផ្សារជំនួសកាន់តែធំរបស់ផលិតផលចិន ដែលវានឹងបង្កផលប៉ះពាល់ខ្លាំងដល់សហគ្រាសធុនតូច និងមធ្យមរបស់ថៃ៕