ព័ត៌មានអន្ដរជាតិ

ឥណ្ឌូណេស៊ីបង្រ្កាបលើគ្រប់បុគ្គល ដែលផ្សព្វផ្សាយល្បែងស៊ីសងអនឡាញ

បានផុស

២ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

ប៉ូលិសឥណ្ឌូណេស៊ីបានបង្កើនការបង្រ្កាបរបស់ខ្លួនលើការផ្សព្វផ្សាយល្បែងស៊ីសងតានអនឡាញ ក្រោមការបញ្ជារបស់ប្រធានាធិបតីថ្មី លោក ប្រាបូវូ ស៊ូប៊ីយ៉ានតូ ដើម្បីលុបបំបាត់សកម្មភាពខុសច្បាប់នេះ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះការបង្រ្កាបនេះ គេឃើញមានការចាប់ខ្លួនកាលពីពេលថ្មីៗ ទៅលើបុគ្គលមានឥទ្ធិពលលើបណ្ដាញសង្គម តារាល្បីៗ និងសិស្សនិស្សិតជាច្រើននាក់ ដែលរងការចោទប្រកាន់ពីបទផ្សព្វផ្សាយគេហទំព័រលេងល្បែងស៊ីសងនៅលើបណ្ដាញសង្គម។

ក្នុងអំឡុងសម័យប្រជុំពេញអង្គគណៈរដ្ឋមន្ត្រីនៅវិមានរដ្ឋកាលពីថ្ងៃពុធ លោក ប្រាបូវូ បានរំឭកឡើងវិញនូវការប្តេជ្ញាចិត្តរបស់លោកក្នុងការកម្ចាត់ល្បែងស៊ីសង ដោយបន្តវិធានការតឹងរ៉ឹងពីមេដឹកនាំឥណ្ឌូណេស៊ីចាស់ គឺលោក ចូកូ វីដូដូ ដែលបានបញ្ជាឱ្យបិទទីតាំងល្បែងទាំងអស់។

កន្លងមកផងដែរ ប្រធានាធិបតីថ្មីដដែលបានបញ្ជាក់ហើយថា លោកនឹងមិនអត់ឱនឱ្យមន្ត្រីរដ្ឋាភិបាល ឬសមាជិកនៃកងកម្លាំងសន្តិសុខណា ដែលប្រើឥទ្ធិពលរបស់ខ្លួនដើម្បីការពារប្រតិបត្តិការល្បែងស៊ីសងអនឡាញនោះទេ។

បើតាមកាសែត Jakarta Globe ការលេងល្បែងស៊ីសងតាមអ៊ិនធឺណិតបានរីករាលដាលយ៉ាងខ្លាំងក្នុងប្រទេសឥណ្ឌូណេស៊ី ដោយសូម្បីតែសមាជិកសភាខ្លះក៏បានចូលរួមដែរ។ ថ្មីៗនេះ មជ្ឈមណ្ឌលរបាយការណ៍ និងវិភាគប្រតិបត្តិការហិរញ្ញវត្ថុ (PPATK) បានបង្ហាញឱ្យឃើញថា សមាជិកសភាតំណាងជាតិ និងមូលដ្ឋាន ជាង ១ ០០០ នាក់ បានចូលរួមលេងល្បែងអនឡាញ ដោយមានការភ្នាល់គ្នាសរុបគិតជាលុយដល់ ១,៥ លានដុល្លារ។ អត្តសញ្ញាណសមាជិកទាំងនោះ មិនទាន់ត្រូវបានគេបង្ហាញឱ្យដឹងនោះទេ។

ល្បែងស៊ីសង គឺជាឧក្រិដ្ឋកម្មក្រោមច្បាប់ឥណ្ឌូណេស៊ី ដែលអាចផ្តន្ទាទោសដាក់ពន្ធនាគាររហូតដល់ ៦ ឆ្នាំ៕