ព័ត៌មានអន្ដរជាតិ

១០ ខែដើមឆ្នាំ ថៃទទួលភ្ញៀវទេសចរបរទេស ២៩ លាននាក់ កើបប្រាក់ជាង ១,៣ ទ្រីលានបាត

បានផុស

២ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

រដ្ឋមន្ត្រីក្រសួងទេសចរណ៍ និងកីឡាថៃ លោក Sorawong Thienthong បានឱ្យដឹងកាលពីថ្ងៃពុធថា ប្រទេសថៃបានស្វាគមភ្ញៀវទេសចរបរទេសប្រមាណ ២៩ លាននាក់ ក្នុងរយៈពេល ១០ ដើមឆ្នាំ និងកើបប្រាក់ចំណូលប្រមាណ ១,៣៥ ទ្រីលានបាត (៣៩,៣ ប៊ីលានដុល្លារ)។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិនឈរមុខគេលើប្រភពភ្ញៀវទេសចររបស់ថៃ ដោយរួមចំណែកភ្ញៀវប្រមាណជាង ៥,៧ លាននាក់ បន្ទាប់មកគឺម៉ាឡេស៊ី (៤,១ លាននាក់) ឥណ្ឌា (១,៧ លាននាក់) កូរ៉េខាងត្បូង (១,៥ លាននាក់) និងរុស្ស៊ី (១,៣ លាននាក់)។

គិតតែសប្ដាហ៍មុន ថៃបានទទួលភ្ញៀវទេសចរបរទេសប្រមាណជាង ៧០០ ០០០ នាក់ ដោយកើនឡើង ២០ ភាគរយ ធៀបនឹងសប្ដាហ៍មុនមួយទៀត។

លោករដ្ឋមន្រ្តី Sorawong បានគូសបញ្ជាក់ផងដែរថា កំណើនភ្ញៀវទេសចររួមចំណែកដោយការចាប់ផ្ដើមនៃរដូវបុណ្យជាតិសំខាន់ៗនៅអាមេរិកខាងជើង អឺរ៉ុប និងអូសេអានី។ ជាមួយគ្នានេះ វាក៏រួមចំណែកផងដែរពីពិធីបុណ្យហិណ្ឌូ Diwali ដែលជំរុញភ្ញៀវបរទេសមកពីឥណ្ឌា ម៉ាឡេស៊ី ក៏ដូចជាសិង្ហបុរី។

គួរគូសបញ្ជាក់ថា ថៃបានកំណត់គោលដៅទទួលភ្ញៀវទេសចរបរទេសឱ្យបានក្នុងរង្វង់ ៣៦ លាននាក់នៅឆ្នាំនេះ។ កាលពីចុងខែតុលា អាជ្ញាធរទេសចរណ៍ថៃបានអះអាងថា ថៃនឹងសម្រេចបាននូវគោលដៅនេះ ជាមួយនឹងការទទួលភ្ញៀវទេសចរប្រមាណជាង ១០ លាននាក់ នៅត្រីមាសចុងក្រោយនៃឆ្នាំ៕