ព័ត៌មានអន្ដរជាតិ

វៀតណាមព្រមានឱ្យក្រុមហ៊ុននាំចេញក្នុងស្រុក ប្រុងប្រយ័ត្ននឹងការស៊ើបការពារពាណិជ្ជកម្ម

បានផុស

១ ម៉ោង មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

អ្នកជំនាញវៀតណាមព្រមានក្រុមហ៊ុននាំចេញក្នុងស្រុករបស់ខ្លួន ឱ្យបង្កើនការពង្រឹងខ្លួន និងប្រុងប្រយ័ត្នចំពោះការស៊ើបអង្កេតការពារណិជ្ជកម្ម រួមទាំងការស៊ើបអង្កេតប្រឆាំងការលក់បង្ខូចតម្លៃរបស់ប្រទេសនាំចេញ ខណៈបន្តប្រមូលផលប្រយោជន៍ពីកំណើននៃតម្រូវការសកល។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកមជ្ឈមណ្ឌលគាំទ្រផ្នែកច្បាប់ និងអភិវឌ្ឍន៍ធនធានមនុស្ស ក្រោមសមាគមសហគ្រាសធុនតូច និងមធ្យមវៀតណាម លោក Lê Anh Văn បានអំពាវនាវឱ្យក្រុមហ៊ុននាំចេញក្នុងស្រុក រក្សាបាននូវភាពនាំមុខគេ ដោយលើកឡើងពីតម្រូវការតាមដានប្រចាំលើការស៊ើបអង្កេតការពារពាណិជ្ជកម្ម តាមរយៈទីភ្នាក់ងារពាណិជ្ជកម្មរបស់វៀតណាមនៅបរទេស។

លោកបានបន្តថា ការបង្កើតថ្មី ការធ្វើពិពិធកម្ម និងការកែលម្អគុណភាពផលិតផល គឺជាគន្លឹះមូលដ្ឋាន ខណៈក្រុមការងារដែលមានជំនាញច្បាស់លាស់ក្នុងការស៊ើបអង្កេតការពារពាណិជ្ជកម្ម និងប្រព័ន្ធគ្រប់គ្រងដែលពាក់ព័ន្ធ គឺជាកត្តាសំខាន់ពេលមានបញ្ហាប្រឈម។

ការព្រមាននេះ ធ្វើឡើងខណៈការនាំចេញរបស់វៀតណាមដែលល្បីល្បាញដោយសារការប្រកួតប្រជែងផ្នែកកម្លាំងពលកម្ម និងថ្លៃដើមផលិតកម្ម កើនឡើងស្របតាមស្តង់ដារគុណភាពអន្តរជាតិ។ ទោះជាយ៉ាងណាក៏ដោយ ភាពជោគជ័យនេះ បានបង្កជាការប្រុងប្រយ័ត្នសម្រាប់ប្រទេសនាំចូល ដែលជំរុញឱ្យពួកគេប្រើប្រាស់វិធានការការពារពាណិជ្ជកម្ម ដើម្បីការពារឧស្សាហកម្មក្នុងស្រុករបស់ខ្លួន។ នេះបើតាមអនុប្រធានអាជ្ញាធរការពារពាណិជ្ជកម្ម ក្រោមក្រសួងឧស្សាហកម្ម និងពាណិជ្ជកម្មវៀតណាម (MoIT) លោក Truong Thuy Linh។

អ្នកជំនាញវៀតណាមមើលឃើញថា តម្រូវការប្រើប្រាស់ចុងឆ្នាំនៅទីផ្សារធំៗដូចជាសហរដ្ឋអាមេរិក និងសហភាពអឺរ៉ុប រំពឹងថានឹងផ្តល់អត្ថប្រយោជន៍ដល់គ្រឿងអេឡិចត្រូនិក ទំនិញប្រើប្រាស់ និងវិស័យវាយនភណ្ឌវៀតណាម។ ឧស្សាហកម្មវាយនភណ្ឌ នៅតែទទួលបានប្រយោជន៍ ពេលការបញ្ជាទិញនាំចេញពីបង់ក្លាដែសបានប្រែប្រួល។ លើសពីនេះ ទីផ្សារកិច្ចព្រមព្រៀងពាណិជ្ជកម្មសេរី (FTA)ព្យាករថានឹងរក្សានិរន្តរភាពនៃការប្រកួតប្រជែងរបស់វៀតណាម ទាំងក្នុងវិស័យពាណិជ្ជកម្ម និងការវិនិយោគ៕