ភ្ញៀវទេសចរទិញសំបុត្រចូលទស្សនាអង្គរជាង ៣៥០០ នាក់ ក្នុងមួយថ្ងៃ

មន្ទីទេសចរខេត្តសៀមរាប បានឱ្យដឹងថា នៅថ្ងៃទី ០៨ ខែវិច្ឆិកា ឆ្នាំ ២០២៤ ភ្ញៀវទេសចរចអន្តរជាតិបានទិញសំបុត្រចូលទស្សនារមណីយដ្ឋានអង្គរប្រមាណចន្លោះពី ៣៥០០-៣៨០០ នាក់ ក្នុងមួយថ្ងៃ។

លោក ខៀវ ធី ប្រធានសមាគមមគ្គុទេសក៏ទេសចរអង្គរប្រាប់កម្ពុជាថ្មីថា ភ្ញៀវទេសចរនៅឆ្នាំនេះ មានការកើនឡើងច្រើន​តែនៅក្នុងខែ ១១ មគ្គុទេសក៏ទេសចរមមាញឹកច្រើន និងការកក់បន្ទប់ ផ្ទះសំណាក់ សណ្ឋាគារនៅខេត្តសៀមរាបមានកំណើនខ្ពស់ក្នុងខែវិច្ឆិកានេះ។

យោងតាមគ្រឹះស្ថានអង្គរ គិតត្រឹមរយៈពេល ១០ ខែ ឆ្នាំ ២០២៤ មានភ្ញៀវទេសចរបរទេសចំនួនជាង ៧៧ ម៉ឺននាក់ បានទិញសំបុត្រ​ចូលទស្សនារមណី​យដ្ឋាន​អង្គរគិតជាទឹក​ប្រាក់​​​ប្រមាណជិត ៣៦ លានដុល្លារ កើនឡើង ២៩,០៧ % ប្រៀបធៀបរយៈពេលដូចគ្នានៅឆ្នាំ ២០២៣។

យោងតាមក្រសួងទេសចរណ៍ នៅក្នុងរយៈពេល ៩ ខែ ឆ្នាំ ២០២៤ (មករា-កញ្ញា) កម្ពុជា ទទួលបានភ្ញៀវអន្តរ​ជាតិសរុប​ចំនួន​ជាង​ ៤,៨០ លាននាក់ កើនឡើង ២២,២ ភាគរយ បើធៀបនឹង​រយៈ​ពេល​ដូចគ្នាក្នុងឆ្នាំ ២០២៣ ដែលមានចំនួន ៣,៩២ លាននាក់៕

អត្ថបទ ៖ ឡេង ដេត