ព័ត៌មានអន្ដរជាតិ

KFC បិទហាងនៅឥណ្ឌូណេស៊ីជិត ៥០ សាខា បញ្ឈប់បុគ្គលិករាប់ពាន់នាក់

បានផុស

៥ ខែ មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

ក្រុមហ៊ុនហាងអាហាររហ័ស KFC ប្រចាំឥណ្ឌូណេស៊ី បានរាយការណ៍ពីការខាតបង់ប្រាក់ជាង ៣៦ លានដុល្លារអាមេរិក គិតត្រឹមត្រីមាសទី៣នៃឆ្នាំនេះ ដែលបង្ខំឱ្យក្រុមហ៊ុនត្រូវបិទហាងចំនួន ៤៧ សាខា និងបញ្ឈប់បុគ្គលិកចំនួន ២ ២៧៤ នាក់។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ហិរញ្ញវត្ថុរបស់ខ្លួន ក្រុមហ៊ុន FAST ដែលគ្រប់គ្រង KFC ប្រចាំប្រទេសឥណ្ឌូណេស៊ី បានបង្ហាញថា ក្នុងរយៈពេល៩ខែដំបូងដើមឆ្នាំ ២០២៤ ក្រុមហ៊ុនបានកាត់បន្ថយចំនួនហាងប្រតិបត្តិការរបស់ខ្លួនមកត្រឹម ៧១៥ កន្លែង ពី ៧៦២ កន្លែងនៅឆ្នាំ ២០២៣។ ចំនួនបុគ្គលិកក៏ត្រូវបានកាត់បន្ថយផងដែរ ពីជិត ១៦ ០០០ នាក់ មកត្រឹម ១៣ ៧០០ នាក់ មកទល់ពេលនេះ។

កត្តាដ៏ធំបំផុតដែលធ្វើឱ្យប្រាក់ចំណូលធ្លាក់ចុះ គឺការធ្លាក់ចុះខ្លាំងនៃការលក់អាហារ និងភេសជ្ជៈ ដែលរកបានត្រឹមតែ ២២៥ លានដុល្លារ គិតត្រឹមត្រីមាសទី ៣ ដែលថយចុះ ២២,៤ ភាគរយ ក្នុងប្រចាំឆ្នាំ។

មន្រ្តីរបស់ក្រុមហ៊ុន FAST បានចាត់ទុកការធ្លាក់ចុះទាំងនេះ ថាជាផលប៉ះពាល់អវិជ្ជមានយូរអង្វែងនៃវិបត្តិកូវីដ១៩។ ការងើបឡើងវិញពីវិបត្តិនេះ មិនទាន់អាចជួយក្រុមហ៊ុនឱ្យសម្រេចបាននូវគោលដៅលក់ដែលខ្លួនរំពឹងនោះទេ ខណៈស្ថានភាពទីផ្សារកាន់តែយ៉ាប់យ៉ឺន ដោយសារការធ្វើពហិកាពីអតិថិជន ជុំវិញជម្លោះនៅមជ្ឈិមបូព៌ាដែលកំពុងបន្ត៕