កម្ពុជារកចំណូលបានជាង ៣,៤ ពាន់លានដុល្លារ ពីការនាំចេញកសិផល កើនឡើងជិត ៥០%

គិតត្រឹមរយៈពេល ១០ខែ ឆ្នាំ២០២៤ កម្ពុជាបាននាំចេញកសិផលក្នុងតម្លៃសរុបប្រមាណ ៣,៤ពាន់លានដុល្លារ កើនឡើងជិត៥០% ធៀបនឹងរយៈពេល ដូចគ្នានៅឆ្នាំ ២០២៣។ នេះបើតាមការឱ្យដឹងពីលោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។

លោក ឃឹម ហ្វីណង់ បានប្រាប់ឱ្យដឹងនៅថ្ងៃទី ១៣ ខែវិច្ឆិកា ឆ្នាំ ២០២៤ នេះថា សក្ដានុពលតម្លៃបន្ថែមពីស័យកសកម្ម ចំពោះសេដ្ឋកិច្ចជាតិនៅមានទំហំធំ ប្រសិនបើកម្ពុជាអាចរកវិធីកែច្នៃ ហើយនាំចេញ។

លោក ឃឹម ហ្វីណង់ បានអំពាវនាវឱ្យរួមគ្នា ជំរុញ និងគាំទ្រលើការប្រើប្រាស់ពូជ​យុទ្ធសាស្ត្ររបស់ខ្លួន និងចូល​រួមចងក្រង​គ្នាជាសហគមន៍កសិកម្មទំនើប ព្រមទាំងជំរុញការវិនិយោគទៅលើការកែច្នៃនៅក្នុងស្រុក និងការ​ពង្រីក​ទីផ្សារនាំចេញកសិផលកែច្នៃរួចទៅក្រៅប្រទេស។

លោក ឃឹម ហ្វីណង់ ថ្លែងថា៖ «យើងចង់បានតម្លៃបន្ថែមពីការនាំចេញរបស់យើងឱ្យបានច្រើនជាងមុន រាល់ថ្ងៃយើងនាំចេញកសិកផលក្នុងទម្រង់ដើម ឆៅ មិនថាស្រូវ ឬចន្ទីទេ ដំឡូងមី ក៏នាំចេញឆៅដែរ យើងគិតថា គ្រាន់តែស្វាយចន្ទីមួយ យើង​បកសំបកហើយនាំចេញ យើងអាចចំណេញបានប្រមាណ ១ ពាន់លានដុល្លារបន្ថែមទៀត ហើយរឿងនេះ រឿងធំ គុណសម្បត្តិ​វានឹងបានទៅដល់សេដ្ឋកិច្ចជាតិតែម្ដង យើងចង់ឱ្យកែច្នៃក្នុងស្រុក ដែលបានបង្កើតការងារបានបន្ថែមក្នុងវិស័យកសិកម្ម ចំណូលពន្ធបានចូលមកក្នុងសេដ្ឋកិច្ច ការងារនេះយើងធ្វើតាមរយៈសហគមន៍កសិកម្មទំនើប»។

លោក ឃឹម ហ្វីណង់លើកឡើងថា៖ «កន្លងមក អ្នកវិនិយោគបារម្ភពីការវិនិយោគផ្នែកខាងក្រោម (Downstream) ដោយ​សារ​តែផ្នែកខាងលើ (Upstream) ស្រពេជស្រពិល យើងមិនមែនផលិតមិនបានទេ គឺយើងផលិតបាន ដែលយើងមានកសិករជាង ២ លានគ្រួសារ ដែលផលិត ហើយផលិតលើសស្ទើរតែគ្រប់មុខ បញ្ហាគឺវានៅរាយប៉ាយ អត់មានការប្រមូលផ្ដុំ ដែលធ្វើឱ្យអ្នកមកវិនិយោគពិបាកដើរទិញរៀងៗខ្លួន ចង់ម៉ៅឱ្យគេទិញម៉ៅអត់កើត ដល់អញ្ចឹងទៅ ធ្វើឱ្យគេមិនហាន​វិនិយោគ នៅខាងក្រោមដោយសារខាងលើអត់ច្បាស់ យើងបង្កើតសហគមន៍កសិកម្មដើម្បីធានាថា យើងហាននិយាយម៉ាត់ណា ម៉ាត់ហ្នឹង យើងមានការផ្គត់ផ្គង់ធាតុចូលពេញមួយឆ្នាំ ដើម្បីគាត់យកទៅកែច្នៃ ហើយយើងអាចធ្វើតាម​រយៈការធ្វើកិច្ចសន្យាកសិកម្មបានផងដែរ ហើយយើងធ្វើដូច្នេះបាន យើងនឹងឈានដល់ការរក្សាទុកតម្លៃបន្ថែមក្នុងសេដ្ឋកិច្ចជាតិហើយ»៕

អត្ថបទ៖ ឡេង ដេត