ព័ត៌មានអន្ដរជាតិ

ឧស្សាហកម្មប្រេងអាមេរិក អំពាវនាវឱ្យ ត្រាំ ទម្លាក់ចោលគោលនយោបាយអាកាសធាតុរបស់ បៃដិន

បានផុស

៣០ វិនាទី មុន

នៅ

ថ្ងៃពុធ ១៣ វិច្ឆិកា ២០២៤

ដោយ

ឧស្សាហកម្មប្រេង និងឧស្ម័នរបស់សហរដ្ឋអាមេរិក បានអំពាវនាវកាលពីថ្ងៃអង្គារឱ្យប្រធានាធិបតីជាប់ឆ្នោត លោក ដូណាល់ ត្រាំ លុបចោលគោលនយោបាយជាច្រើនរបស់ប្រធានាធិបតី ចូ បៃដិន ដែលមានបំណងប្រយុទ្ធប្រឆាំងនឹងការប្រែប្រួលអាកាសធាតុ ដោយសារតែវាគំរាមកំហែងដល់វិស័យការងារ ជម្រើសអ្នកប្រើប្រាស់ និងសន្តិសុខថាមពល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានប្រេងអាមេរិក (API) ដែលជាសមាគមពាណិជ្ជកម្មប្រេង និងឧស្ម័នកំពូលរបស់ប្រទេស បានជំរុញឱ្យរដ្ឋបាល ត្រាំ ថ្មី លុបចោលស្តង់ដារការបំភាយយានយន្តដែលដាក់ចេញដើម្បីលើកកម្ពស់រថយន្តអគ្គិសនី លុបចោលការរឹតត្បឹតលើការអនុញ្ញាតសម្រាប់ការនាំចេញគ្រឿងបរិក្ខារឧស្ម័នធម្មជាតិពង្រាវ ហើយធ្វើការជាមួយសភាដើម្បីលុបចោលការបង់ថ្លៃសម្រាប់ការបំភាយឧស្ម័នមេតានពីប្រតិបត្តិការខួងប្រេង ក្នុងចំណោមសកម្មភាពផ្សេងៗទៀត។

ការអំពាវនាវរបស់ឧស្សាហកម្មប្រេង និងឧស្ម័នអាមេរិក ធ្វើឡើងខណៈមានការព្រួយបារម្ភថា លោក ត្រាំ នឹងធ្វើឱ្យជំហររបស់សហរដ្ឋអាមេរិកលើការប្រឆាំងការប្រែប្រួលអាកាសធាតុធ្លាក់ចុះ។ ពេលធ្វើយុទ្ធនាការបោះឆ្នោត លោក ត្រាំ បានប្ដេជ្ញាថានឹងលុបចោលច្បាប់ និងគោលនយោបាយបរិស្ថានរាប់សិប ដែលគេមើលឃើញថាជាបញ្ហាសម្រាប់ក្រុមហ៊ុនខួងប្រេង និងឧស្ម័ន។ កន្លងមក ទោះបីជាមានបទប្បញ្ញត្តិតឹងរ៉ឹងក្រោមការដឹកនាំរបស់លោក បៃដិន ដែលមានទំនោរលើថាមពលស្អាតក្ដី ឧស្សាហកម្មក្នុងស្រុកអាមេរិកបានផលិតប្រេង និងឧស្ម័ន ច្រើនជាងពេលណាៗទាំងអស់ក្នុងប្រវត្តិសាស្ត្ររបស់អាមេរិក។

ហើយបើទោះបីជាយ៉ាងណាក៏ដោយ នាយកប្រតិបត្តិ API លោក Mike Sommers បាននិយាយប្រាប់អ្នកសារព័ត៌មានថា លទ្ធផលបោះឆ្នោតអាមេរិកកាលពីសប្ដាហ៍មុន បង្ហាញថា អ្នកបោះឆ្នោតអាមេរិកមិនចង់ឱ្យមានការដាក់រឹតត្បឹតរបស់រដ្ឋាភិបាលលើថាមពលនោះទេ។

API ក៏បានតស៊ូមតិគាំទ្រដល់ការនាំចេញឧស្ម័នធម្មជាតិពង្រាវ ការបង្កើនការដេញថ្លៃលើការខួងយកប្រេង និងឧស្ម័ននៅឈូងសមុទ្រម៉ិកស៊ិក និងទម្លាក់ចោលនូវច្បាប់ ដែល «កំណត់ការអភិវឌ្ឍន៍ប្រេង និងឧស្ម័ននៅលើទឹកដីសហព័ន្ធ»។ ក្រុមឧស្សាហកម្មដដែល ចង់ឱ្យ ត្រាំ ធ្វើឱ្យវាកាន់តែងាយស្រួលក្នុងការទទួលបានការអនុញ្ញាតសម្រាប់ការខួងយករ៉ែតាមរយៈការផ្លាស់ប្តូរច្បាប់ទឹកស្អាត និងច្បាប់គោលនយោបាយបរិស្ថានជាតិ និងអនុវត្តគោលនយោបាយពន្ធលើកទឹកចិត្តសម្រាប់ការវិនិយោគហេដ្ឋារចនាសម្ព័ន្ធ និងក្រៅប្រទេស៕