ព័ត៌មានអន្ដរជាតិ

តម្លៃមាសអន្តរជាតិធ្លាក់ចុះទាបបំផុតជិត ២ ខែ ដោយសារលុយដុល្លារខ្លាំង ក្រោយ ត្រាំ ជាប់ឆ្នោត

បានផុស

១៤ ម៉ោង មុន

នៅ

ថ្ងៃពុធ ១៣ វិច្ឆិកា ២០២៤

ដោយ

តម្លៃមាសជួញដូរលើទីផ្សារអន្តរជាតិ បានធ្លាក់ចុះដល់កម្រិតទាបបំផុតក្នុងរយៈពេលជិត២ខែកាលពីថ្ងៃអង្គារ ដោយសារតែការឡើងថ្លៃនៃប្រាក់ដុល្លារ ក្រោយលោក ដូណាល់ ត្រាំ ជាប់ឆ្នោតក្លាយជាប្រធានាធិបតីអាមេរិកជាថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសជួញដូរភ្លាមៗនៅទីផ្សារហាងឆេង បានធ្លាក់ចុះ ០,៩ ភាគរយ មកត្រឹម ២ ៥៩៥,៩៨ ដុល្លារ/អោន ខណៈតម្លៃមាសនាពេលអនាគតរបស់អាមេរិក បានធ្លាក់ចុះ ០,៦ ភាគរយ មកនៅត្រឹម ២ ៦០១,៥០ ដុល្លារ/អោន។

គិតមកទល់ពេលនេះ តម្លៃមាសបានធ្លាក់ចុះច្រើនជាង ៥ ភាគរយ បាត់ទៅហើយ រាប់តាំងពីការបោះឆ្នោតប្រធានាធិបតីអាមេរិកថ្ងៃទី ៥ វិច្ឆិកា សប្ដាហ៍មុន ចំពេលវិនិយោគិនប្ដូរទំនោរទៅលើផ្សារភាគហ៊ុនរបស់អាមេរិក ក្រោយ លោក ត្រាំ ឈ្នះឆ្នោត។

ទោះជាយ៉ាងណាក៏ដោយ តម្លៃមាសបានកើនឡើងច្រើនជាង ២៥ ភាគរយ នៅឆ្នាំនេះ ដែលជំរុញដោយការបន្ធូរបន្ថយគោលនយោបាយហិរញ្ញវត្ថុរបស់ធនាគារកណ្ដាលអាមេរិក ការទិញមាសរបស់ធនាគារកណ្ដាល និងការកើនឡើងនៃហានិភ័យភូមិសាស្ត្រនយោបាយ និងសេដ្ឋកិច្ច ដែលជំរុញតម្រូវការហក់ឡើង៕