លោកនាយករដ្ឋមន្រ្តី៖ កម្ពុជា ជាទីតាំងអំណោយ​ផល​សម្រាប់អ្នកវិនិយោគ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា ស្ថានភាពបច្ចុប្បន្ន ពិភពលោកកំពុងប្រឈមនឹង​ អស្ថិរភាពនយោបាយ នៅតាមបណ្ដាប្រទេសជាច្រើន ប៉ុន្តែកម្ពុជា​អាច​រក្សា​​បាននូវសុខសន្តិភាពពេញលេញ និងរក្សាកំណើនសេដ្ឋកិច្ចគួឱ្យកត់​សម្គាល់ ដែលនេះបង្ហាញនូវ​សក្ដានុពលរបស់កម្ពុជា ក្នុងការគិតគូ វិនិយោគ និងពង្រឹងមូលដ្ឋានអាជីវកម្មខ្លួនឯង។

សម្ដេចធិបតី ហ៊ុន ម៉ាណែត មានប្រសាសន៍នៅក្នុងពិធីសំណេះសំណាល និងពិសាភោជនា​ហារ​សាមគ្គី ជាមួយសហគ្រិន ត្រកូលលីន ពិភពលោក កាលពីល្ងាចថ្ងៃទី ១២ ខែវិច្ឆិកា ឆ្នាំ ២០២៤។

សម្ដេចធិបតី បានឱ្យដឹងថា៖ «ធុរកិច្ចត្រូវការបរិយាកាសអំណោយផល ដើម្បីប្រតិបត្តិការ​ដោយរលូន និងរីកចម្រើន ខ្ញុំគិតថា ធុរកិច្ច ក៏ដូចជាមនុស្សគ្រប់គ្នា និងគ្រប់វិស័យដែរ​ គឺលុះត្រាណាតែលោកអ្នកស្រឡាញ់សង្គ្រាម និងស្រឡាញ់ការប្រយុទ្ធ ពុំដូច្នោះទេ សន្តិភាព និងស្ថិរភាព គឺជាគោលដៅ ហើយកម្ពុជាបានផ្ដល់ជូននូវគោលដៅនេះ ស្របពេលដែល​ស្ថានភាពពិភពលោក កំពុងប្រែប្រួលឥតឈប់ឈរ ហើយនៅពេលខ្លះស្ថិតក្នុង​ទិសដៅមិន​ច្បាស់លាស់ ស្ថិរភាព និងបរិយាកាស ដែលអាចព្យាករណ៍បាន កាន់តែក្លាយជាលក្ខខណ្ឌ​តម្រូវជាមុន»។

សម្ដេចធិបតីបានលើកយកកត្តាសំខាន់ៗមួយចំនួន ដែលធ្វើឱ្យប្រទេសកម្ពុជា មានភាពទាក់​ទាញ ជាគោលដៅផ្គត់ផ្គង់ និងជាទិសដៅសម្រាប់ការវិនិយោគរួមមាន៖ កម្ពុជាផ្ដល់ជូននូវកត្តាសន្តិភាព និងស្ថិរភាព ជាកត្តាមូលដ្ឋានដែលអនុញ្ញាត​ឱ្យអ្នកវិនិយោគ ធ្វើការ​សម្រេចចិត្តអំពីទីតាំងដែលត្រូវវិនិយោគ ដូចដែលលោកអ្នកបានឃើញស្រាប់ លោកអ្នក​មកលេងប្រទេសកម្ពុជាថ្ងៃនេះ  ហើយអ្នកស្នាក់នៅ ២ ទៅ ៣ ថ្ងៃ ប្រទេសកម្ពុជាមានសុវត្ថិភាពណាស់។

«លោកអ្នកមួយចំនួន ប្រហែលជាបានលឺនៅក្នុងសារព័ត៌មាន អំពីស្ថានភាពមួយចំនួន ពាក់ព័ន្ធនឹងទិដ្ឋភាពសន្តិសុខ នៃប្រទេសកម្ពុជា ដែលអាចធ្វើឱ្យមនុស្សជាច្រើន​មានការភ័យព្រួយ ប៉ុន្តែសូមជឿប្រាកដចុះថា ប្រទេសកម្ពុជាមានសុវត្ថិភាព និងសន្តិភាពគ្រប់គ្រាន់សម្រាប់អ្នកធ្វើធុរកិច្ច»។ នេះបើយោងតាមការលើកឡើងរបស់សម្តេចធិបតី។

សម្ដេចធិបតីបានអះអាងថា៖«​ សន្តិសុខ និងសុវត្ថិភាព មានសម្រាប់ទាំងអស់គ្នា រួមទាំងជនបរទេស​ដែលរស់នៅប្រទេស​កម្ពុជា អ្នកវិនិយោគ ភ្ញៀវទេសចរដែលមកទស្សនា​ប្រទេសកម្ពុជា គឺយើង​យក​ចិត្តទុកដាក់ជាអាទិភាពបំផុត ដូចគ្នានឹងប្រជាពលរដ្ឋកម្ពុជា​ដែលរស់នៅទីនេះ ដើម្បីផ្ដល់ជូននូវសន្តិសុខ និងបរិស្ថានស្ថិរភាពសម្រាប់លោកអ្នក»។

សម្ដេចនាយករដ្ឋមន្ត្រីបានថ្លែងបន្តថា កម្ពុជាផ្ដល់ជូននូវស្ថិរភាពម៉ាក្រូសេដ្ឋកិច្ច ដែលបានជាប់ចំណាត់ថ្នាក់ជាទីផ្សារ ដែលកំពុងរីកចម្រើនបំផុត សម្រាប់ការវិនិយោគបរទេសនៅឆ្នាំ ២០២៤ កំណើន GDP  មានភាពរឹងមាំ​ ខណៈ​អតិផរណានៅតែទាបជាង ៣% នារយៈពេលប៉ុន្មានឆ្នាំចុងក្រោយនេះ។

ជាមួយគ្នានេះដែរ សម្ដេចធិតីបានបន្តថា កម្ពុជាមានបរិយាកាសធុរកិច្ចប្រកបដោយភាពស្និទ្ធស្នាល និងឆ្លើយតបទៅនឹងតម្រូវការរបស់អ្នកវិនិយោគ ច្បាប់វិនិយោគរបស់យើង មានលក្ខណៈសេរី ជាមួយនឹងការលើកទឹកចិត្តចម្រុះ យើងផ្ដល់ជូននូវកម្មសិទ្ធិភាគហ៊ុនបរទេស ១០០% បើប្រៀបធៀប ទៅនឹងប្រទេសជិតខាងមួយចំនួន ដែលមិនបានអនុញ្ញាត។

សម្ដេចធិបតី ហ៊ុន ម៉ាណែតថ្លែងថា៖ «យើងមិនមានការរឹតបន្តឹងលើការផ្ទេរត្រឡប់ប្រាក់ចំណេញ និងដើមទុនទេ មានការបង្កើតតំបន់សេដ្ឋកិច្ចពិសេស និងតំបន់ឧស្សាហកម្មពិសេស ដោយកំណត់ទៅតាមប្រទេសជាក់លាក់ យើងបានបង្កើតវេទិកាប្រឹក្សាយោបល់ផ្សេងៗរវាងវិស័យឯកជន និងរាជរដ្ឋាភិបាល ដើម្បីធានាថា អាជីវកម្មដែលដំណើរការក្នុងប្រទេសកម្ពុជា មានមធ្យោបាយបង្ហាញពីការព្រួយបារម្ភ និងបញ្ហាណាមួយ ដែលលោកអ្នកត្រូវការនូវការយកចិត្ត ទុកដាក់ ពីរដ្ឋាភិបាលគ្រប់ពេលវេលា ដូច្នេះយើងអាចផ្ដល់នូវដំណោះស្រាយរហ័ស និងឆ្លើយតបទាន់ពេលវេលា»។

លើសពីនេះទៅទៀត សម្ដេចធិបតីបានថ្លែងថា កម្ពុជាជាទីតាំងយុទ្ធសាស្ត្រ និងទទួលបានឱកាស អំពីកិច្ចព្រមព្រៀងពាណិជ្ជកម្មនានា វិនិយោគនៅកម្ពុជា គឺមិនត្រឹមតែវិនិយោគ សម្រាប់ទីផ្សារប្រជាជន ១៧ លាននាក់នោះទេ ប៉ុន្តែការវិនិយោគនៅកម្ពុជា គឺជាការបើកឱកាសទៅកាន់តំបន់ផ្សេងទៀតលើពិភពលោក ដោយសារកម្ពុជា មានកិច្ចព្រមព្រៀងជាច្រើនរួមទាំង កិច្ចព្រមព្រៀងពាណិជ្ជកម្មសេរី ជាមួយអាស៊ាន, RCEP, កូរ៉េ (FTA) កូរ៉េ និងចិន។

កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយជាមួយ UAE និងកូរ៉េ ក៏ដូចជាការផ្ដល់ជូនជាច្រើនទៀត និងការអនុគ្រោះនានាលើទីផ្សារនៅអឺរ៉ុប និងប្រទេសដ៏ទៃទៀត ដូច្នេះការវិនិយោគនៅកម្ពុជា គឺជាការវិនិយោគទៅកាន់ តំបន់ផ្សេងទៀតលើពិភពលោក៕