កំពង់ផែធំៗទាំងពីររបស់កម្ពុជាបង្ហាញពីការកើនឡើងនៃប្រាក់ចំណូលក្នុងត្រីមាសទី៣

កំពង់ផែធំៗទាំងពីរបស់កម្ពុជាគឺកំពង់ផែស្វយ័តក្រុងភ្នំពេញ (PPAP) និង កំពង់ផែស្វ​យ័តក្រុងព្រះសីហនុ (PAS) បានរាយការណ៍ពីការកើនឡើងនៃចំណូលប្រតិបត្តិការក្នុង​ត្រីមាសទី៣កន្លងមកនេះ ដោយសារតែស្ថានភាពល្អ​ប្រសើរនៃសេដ្ឋកិច្ចទាំងក្នុងតំបន់ និងសកល។

យោងតាមរបាយការណ៍ហិរញវត្ថុរបស់ PPAP ផ្ញើរទៅកាន់ផ្សារមូលបត្រកម្ពុជា (CSX) ក្នុងត្រីមាសទី៣ឆ្នាំនេះ​ ប្រាក់ចំណូលសរុបរបស់ខ្លួនសម្រេចបាន ៥៣,៧០១ ពាន់លានរៀល ដោយមានការកើនឡើងជាង២៨%ធៀបនឹងត្រីមាសទីពីរដែលមានទឹកប្រាក់ប្រមាណ៤១,៨១៣ ពាន់លានរៀល។

ជាមួយគ្នានេះដែរ PPAP ក៏បានរាយការណ៍ថា ខ្លួនក៏ទទួលបាននូវប្រាក់ចំណេញសុទ្ធចំនួន២២,៤៦៦​ ពាន់លានរៀល ក្នុងត្រីមាសទី៣ ដោយកើនឡើងជាង១២២%ធៀបទៅនឹងត្រីមាសទី២ដែលមានទឹកប្រាក់ប្រមាណជាង​១៥​ពាន់លានរៀល។​

PPAP បានថ្លែងថា៖«ការកើនឡើងនៃចំណូល ចំណេញប្រតិបត្តិការ និងចំណេញសុទ្ធ គឺបណ្ដាលមកពីការកើនឡើងនៃបរិមាណកុងតឺន័រ បរិមាណទំនិញ-ប្រេងឥន្ធនៈ និងបរិមាណនាវាឆ្លងកាត់ PPAP ខណៈពេលដែលសំវិធានធនលើការខាតបង់ឱនភាពនៃតម្លៃលើទ្រព្យសកម្មហិរញ្ញវត្ថុមានការថយចុះ»។

សម្រាប់ PAS ក៏បានរាយការណ៍ថា នៅក្នុងត្រីមាសទី៣កន្លងមកនេះ ខ្លួនរកបានប្រាក់​ចំណូល​ជិត ១២១ ពាន់លាន​រៀល ដោយកើនឡើងជាង២៧%ធៀបទៅនឹងត្រីមាសទី២​ដែលសម្រេចបានជិត២៦ពាន់លានរៀល។ ប៉ុន្តែនៅក្នុងត្រី​មាសទី៣នេះ កំពង់ផែសមុទ្រ​មួយនេះបានរាយការណ៍ថាខាតសុទ្ធចំនួនជិត៨ពាន់លានរៀល ដោយកើនឡើង​ជិត​១៣៦%​ធៀបនឹងត្រីមាសទី២ដែលខ្លួនរកបានប្រាក់ចំណេញសុទ្ធសរុបជិត២២ពាន់លានរៀល។​

PAS បានគូសបញ្ជាក់ថា៖«លទ្ធផលនេះបណ្ដាលមកពីបរិមាណទំនិញ និងកុងតឺន័រឆ្លងកាត់ PAS មានការកើនឡើង ធ្វើឲ្យចំណូល និងចំណេញប្រតិបត្តិការមានការកើនឡើង បើធៀបនឹងត្រីមាសទី៣ ឆ្នាំ២០២៣ ទទ្ទឹមនឹងនេះមានការខាតពីអាត្រាប្ដូរប្រាក់យ៉េន(មិនទាន់សម្រេច)ប្រមាណ ៣៤.០២៦.៣៦០ ពាន់រៀល សម្រាប់ត្រីមាសទី៣ ឆ្នាំ២០២៤ ទើបបណ្ដាលអោយមានការខាតសុទ្ធក្រោយបង់ពន្ធ ក្នុងត្រីមាសទី៣ ឆ្នាំ២០២៤»៕