ព័ត៌មានអន្ដរជាតិ

មេដឹកនាំម៉ាឡេស៊ី ព្រួយបារម្ភពីផលប៉ះពាល់នៃគោលនយោបាយការពារនិយមរបស់ ត្រាំ

បានផុស

៣ ខែ មុន

នៅ

ថ្ងៃពុធ ១៣ វិច្ឆិកា ២០២៤

ដោយ

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានសម្ដែងការព្រួយបារម្ភប្រាប់បណ្ដាញទូរទស្សន៍ CNN ថា ការនាំចេញរបស់ម៉ាឡេស៊ីទៅសហរដ្ឋអាមេរិក នឹងរងផលប៉ះពាល់ដោយសារតែគោលនយោបាយការពារនិយមរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ។ នេះបើតាមការចុះផ្សាយរបស់សារព័ត៌មាន South China Morning Post។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រួយបារម្ភរបស់លោក ធ្វើឡើងដោយគូសភ្ជាប់នឹងការណ៍ដែលថា១/៤ នៃការនាំចេញមីក្រូឈីប និងបន្ទះឈីបរបស់ម៉ាឡេស៊ី មានទិសដៅទីផ្សារសហរដ្ឋអាមេរិក។

ដើមឡើយ លោក អាន់វ៉ា ត្រូវបានគេមើលឃើញថាជាអ្នកគាំទ្រលោកខាងលិច។ ប៉ុន្តែចាប់តាំងពីក្លាយជានាយករដ្ឋមន្ត្រីម៉ាឡេស៊ីនៅឆ្នាំ ២០២២ មក លោកបានបង្កជាភាពចម្រូងចម្រាស់ជាមួយសម្ព័ន្ធមិត្តលោកខាងលិចផ្សេងៗ ក្នុងនោះរួមមានទាំងការគាំទ្រដ៏រឹងមាំលើក្រុមហាម៉ាស់ របស់ប៉ាឡេស្ទីន ក៏ដូចជាការសម្រេចចង់ឱ្យម៉ាឡេស៊ីក្លាយជាសមាជិករបស់ BRICS រួមជាមួយប្រេស៊ីល រុស្ស៊ី ចិន ឥណ្ឌា អ៊ីរ៉ង់ និងប្រទេសដទៃទៀត។

ក្នុងបទសម្ភាស៍ជាមួយ CNN ដែលចុះផ្សាយកាលពីម្សិលមិញ និងធ្វើឡើងមុនការបោះឆ្នោតអាមេរិក លោក អាន់វ៉ា បានថ្លែងការពារការសម្រេចចិត្តចូលប្លុក BRICS របស់ខ្លួន ដោយលើកឡើងថា ម៉ាឡេស៊ីជា «ប្រទេសពាណិជ្ជកម្ម» ដូច្នេះវានឹងរងផលប៉ះពាល់ដោយគោលនយោបាយការពារនិយមពីសេតវិមាន។

លោកថ្លែងយ៉ាងដូច្នេះថា៖ «មិនថាយើងចូលរួមជាមួយ BRICS ឬអត់នោះទេ គោលនយោបាយការពារនិយមនឹងប៉ះពាល់ដល់យើង។ ខ្ញុំមានន័យថា មួយភាគធំនៃមីក្រូឈីប និងបន្ទះឈីប ត្រូវបាននាំចេញទៅសហរដ្ឋអាមេរិក ពោលគឺ ២៦ ភាគរយ។ វាពិតជានឹងប៉ះពាល់ដល់ពួកយើង»។

កាលពីខែកក្កដា លោក អាន់វ៉ា បានថ្លែងថា ម៉ាឡេស៊ីបានដាក់ពាក្យចូលរួមជាមួយក្រុម BRICS ហើយកាលពីខែមុនប្លុកនេះ បាននិយាយក្នុងសេចក្ដីថ្លែងការណ៍ចេញផ្សាយនៅលើបណ្ដាញសង្គមថា ម៉ាឡេស៊ីបានក្លាយជាប្រទេសដៃគូរបស់ខ្លួន។

គួរគូសបញ្ជាក់ថា លោក ត្រាំ បានសន្យាថានឹងដាក់ពន្ធ ៦០ ភាគរយ លើទំនិញចិន និង ១០-២០ ភាគរយ លើគ្រប់ទំនិញនៃប្រទេសដទៃទៀត ដែលនាំចូលទៅអាមេរិក។ គោលនយោបាយបែបនេះ អាចប៉ះពាល់ដល់ប្រទេសនានា ដែលនាំចេញទៅអាមេរិកច្រើន ដូចជាម៉ាឡេស៊ី។

លើសពីនេះ សហរដ្ឋអាមេរិកនៅតែជាប្រភពកំពូលរបស់ម៉ាឡេស៊ីលើការវិនិយោគបរទេស ខណៈកិច្ចព្រមព្រៀងរបស់ប្រទេសនេះជាមួយក្រុមហ៊ុនបច្ចេកវិទ្យាយក្សរបស់អាមេរិកដូចជា Amazon Web Services ក្រុមហ៊ុន Google និងក្រុមហ៊ុនMicrosoft អាចជួញដល់សេដ្ឋកិច្ចក្នុងស្រុកប្រមាណ ១៦,៧ ប៊ីលានដុល្លារ។

យ៉ាងណាក៏ដោយ សេដ្ឋវិទូបានលើកឡើងថា ម៉ាឡេស៊ីក៏អាចទទួលបានផលប្រយោជន៍ពីការរំខានការផ្គត់ផ្គង់ដែលបង្កឡើងដោយសង្រ្គាមពាណិជ្ជកម្មរវាងសហរដ្ឋអាមេរិក និងចិនផងដែរ ដោយប្រទេសនេះស្ថិតនៅទីតាំងយុទ្ធសាស្រ្តសម្រាប់គោលនយោបាយចិន+១៕