ពាណិជ្ជកម្មកម្ពុជា-ចិន សម្រេចបានទឹកប្រាក់ជាង $១២ ពាន់លាន កើនឡើង ២៣%

គិតត្រឹមរយៈពេល ១០ ខែ ចាប់ពីខែមករា ដល់ខែតុលា ឆ្នាំ ២០២៤ ពាណិជ្ជកម្មទ្វេភាគីកម្ពុជា-ចិន សម្រេចបានទំហំទឹក​ប្រាក់​ជាង ១២,៣៧ ពាន់លានដុល្លារ កើនឡើងពី ១០ ពាន់លានដុល្លារនៅក្នុងឆ្នាំ ២០២៣ ស្មើនឹង ២៣ ភាគរយ ធៀបនឹងរយៈពេលដូចគ្នា។ នេះបើយោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)។​

ទិន្នន័យរបស់ GDCE បង្ហាញថា ចាប់ពីខែមករា-តុលា ឆ្នាំ ២០២៤ ការនាំចេញ-នាំចូលទំនិញ​រវាង​ប្រទេស​​​​​ទាំងពីរមានទឹកប្រាក់សរុប ១២,៣៧ ពាន់លានដុល្លារ កើនឡើង២៣ ភាគរយ ក្នុង​នោះ​កម្ពុជានាំទំនិញទៅចិន មានតម្លៃ ១,៤២ ពាន់លានដុល្លារ កើន២១,១ ភាគរយ និង​ទំនិញ​ចិន​នាំចូល​មកកម្ពុជា​តម្លៃ ១០,៩៥ ពាន់លានដុល្លារ កើន ២៣,២ ភាគរយ។

ចំនួននេះបង្ហាញថា ឱនភាពពាណិជ្ជកម្មរវាងកម្ពុជា-ចិន បានកើនឡើងដល់ ១៣ ភាគរយ ដែល​មានទឹកប្រាក់ ៩,៥២ ពាន់លានដុល្លារ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីថា កម្ពុជាទិញ​ទំនិញ​ពី​ចិន​មកច្រើនជាងនាំចេញ ក្នុងនោះកម្ពុជា​នាំចូលវត្ថុធាតុដើមក៏ច្រើន។

លោក ឡោ វិចិត្របញ្ជាក់បានបញ្ជាក់ថា កម្ពុជាប្រៀបដូចជាមជ្ឈមណ្ឌលបង្គុំ​ហើយ​នាំចេញ​ទៅ​ទីផ្សារអឺរ៉ុប និងអាមេរិក ដោយសារកម្ពុជាខ្វះវត្ថុធាតុដើម ខណៈផលិតផលនាំចូលមួយ​ចំនួនជា​ផលិត​ផលសម្រេច ហើយមួយចំនួនជាវត្ថុធាតុដើម។​

លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​​នៅ​រាជ្យ​បណ្ឌិត្យសភា​កម្ពុជា ប្រាប់ថា​ឱន​ភាព​ពាណិជ្ជកម្មរវាងកម្ពុជាចិនមិនមានកំណើនខ្ពស់ទេ ដោយសារចិនមានផលិតកម្មរោងចក្រកាត់ដេរ និងរោងចក្រឧស្សាហកម្មច្រើននៅកម្ពុជា។

លោកបណ្ឌិត ហុង វណ្ណៈ បន្តថា ទោះបីកម្ពុជាបានចុះកិច្ចព្រមព្រៀងទីផ្សារ​សេរីជាមួយប្រទេស​ចិនក៏ដោយ ក៏ឱនភាព​ពាណិជ្ជ​កម្ម នៅតែបន្តកើតមាន ដោយសារកម្ពុជាមានតម្រូវការ​ធំពីប្រ​ទេស​ចិន ដែលមានសម្ភារ​បរិក្ខាផ្សេងៗ។

លោកថា តម្រូវការ វត្ថុធាតុដើម សម្ភារៈ ពីប្រទេសចិនធូរថ្លៃជាងគេ បើប្រៀបធៀបជាមួយអាស៊ាន ហើយ​សម្ភារៈវត្ថុធាតុដើមសម្លៀកបំពាក់ក៏មានច្រើន៕

អត្ថបទ៖ ឡេង ដេត