បង្កងអូស្រ្ដាលី ហាក់មានតម្រូវការទីផ្សារការខ្ពស់ តែពិបាកត្រង់បច្ចេកទេសក្នុងដំណើរការចិញ្ចឹម

ជាម្ចាស់កសិដ្ឋានចិញ្ចឹមបង្កងខេត្តខ្ញុំ ស្ថិតភូមិក្រញាំ ឃុំផ្ទះរុង ស្រុកតាលោសែនជ័យ ខេត្តពោធិ៍សាត់ លោក យ៉ាន់ ពិសិដ្ឋ ការចិញ្ចឹមបង្កងអូស្ដ្រាលីនាពេលបច្ចុប្បន្ននេះ ហាក់មានតម្រូវការខ្ពស់ តែពិបាកត្រង់ថា ការចិញ្ចឹមមានលក្ខណៈស្មុគស្មាញបន្ដិចទៅលើផ្នែកបច្ចេកទេស ដែលនាំឱ្យពេលខ្លះអាចមានការខាតបង់ក៏មាន។

ជាអតីតពលករធ្វើការនៅប្រទេសកូរ៉េ លោក យ៉ាន់ ពិសិដ្ឋ បានប្រាប់ កម្ពុជាថ្មី ថា មុខរបរចិញ្ចឹមបង្កងអូស្ដ្រាលីនេះ លោកបានចាប់ផ្ដើមវាឡើងមកតាំងពីឆ្នាំ ២០២០មកម្ល៉េះ ពោលគឺចាប់ពីពេលដែលត្រឡប់មកពីធ្វើការជាពលករនៅឯប្រទេសកូរ៉េ។

លោក បន្តថា សម្រាប់ពេលបច្ចុប្បន្ននេះ ការចិញ្ចឹមបង្កងអូស្ត្រាលី នៅក្នុងកសិដ្ឋានរបស់លោក កំពុងមានតម្រូវការទីផ្សារខ្ពស់ តែគ្រាន់តែពិបាកត្រង់ថា លោកនៅខ្វះខាតប​ច្ចេកទេសចិញ្ចឹម និងពុំទាន់មានទីតាំងធំទូលាយជាងពេលបច្ចុប្បន្ននេះ។ ម្ចាស់កសិដ្ឋានរូបនេះ​ បន្ថែមទៀតថា ប្រភេទបង្កងអូស្ដ្រាលី វាងាយស្រួលឱ្យចំណី ដោយគ្រាន់តែមានស្បែកគោ ចេក និងពោត រួមផ្សំជាមួយចំណីខ្លះ គឺគ្រប់គ្រាន់ហើយ តែអ្វីដែលពិបាកនោះគឺ ការគ្រប់គ្រងទឹកឱ្យមានសីតុណ្ហភាពមួយដែលសមស្របជាមួយនឹងការរស់នៅរបស់វា តែប៉ុណ្ណោះ។

ពិសិដ្ឋ បញ្ជាក់ទៀតថា ប្រភេទបង្កងអូស្ដ្រាលីនេះ ប្រើរយៈពេលចន្លោះពី ៤ខែ ទៅ ៥ខែ ទើបអាចប្រមូលចាប់លក់បាន ដោយបង្កង១គីឡូក្រាម លោកអាចលក់ចេញទៅកាន់ទីផ្សារបានចន្លោះពី ២០ដុល្លារ​ ទៅ២៥ដុល្លារ។ ដោយឡែក សម្រាប់ការបោះដុំទៅកាន់កសិដ្ឋានដូចគ្នា អាចលក់បានចន្លោះ ១គីឡូក្រាម បានក្នុងតម្លៃ ១៤ដុល្លារ​ ទៅ១៥ដុល្លារ ផងដែរ។

ជាមធ្យម កសិដ្ឋានរបស់ពិសិដ្ឋ អាចផ្គត់ផ្គង់ទីផ្សារបង្កងអូស្រ្ដាលី ដោយគិតក្នុងមួយថ្ងៃអាចលក់ចេញបានចន្លោះ ៥០គីឡូក្រាម និងអាចច្រើននេះជាងនេះ ទៅតាមតម្រូវការរបស់អតិថិជន ក្នុងនោះមានដូចជា៖ រាជធានីភ្នំពេញ និងខេត្តព្រះសីហនុ ជាដើម៕

អត្ថបទ ៖ សួស សិត