ព័ត៌មានជាតិ

កម្ពុជា-ជប៉ុនមានក្តីរំពឹងខ្ពស់ក្នុងការជំរុញការទូទាត់ឆ្លងដែនតាមប្រព័ន្ធបាគង

បានផុស

១៨ វិនាទី មុន

នៅ

ថ្ងៃពុធ ២០ វិច្ឆិកា ២០២៤

ដោយ

លោក Toshiya Shimakata ប្រធានក្រុមប្រឹក្សាភិបាលធនាគារឯកទេស អ៊ីអន (ខេមបូឌា) ភីអិលស៊ី បានបង្ហាញសុទិដ្ឋិនិយមចំពោះសក្តានុពលនៃកិច្ចសហប្រតិបត្តិការទូទាត់ឆ្លងដែនរវាង កម្ពុជា-ជប៉ុន តាមរយៈប្រព័ន្ធបាគង សំដៅជំរុញទំនាក់ទំនងពាណិជ្ជកម្ម ការវិនិយោគ និងទាក់ទាញភ្ញៀវទេចរជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក Toshiya Shimakata អំឡុងពេលដែលលោកបានដឹកនាំគណៈប្រតិភូ ពិភាក្សាការងារជាមួយលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជាកាលពីព្រឹកថ្ងៃទី២០ ខែវិច្ឆិកា ឆ្នាំ២០២៤ នៅធនាគារជាតិនៃកម្ពុជា អគារវត្តភ្នំ។

លោក Toshiya Shimakata បានជម្រាបជូនពីវឌ្ឍនភាពប្រតិបត្តិការ ធនាគារឯកទេស អ៊ីអន (ខេមបូឌា) នាពេលកន្លងមក និងបានលើកឡើងពីផែនការពង្រីកការវិនិយោគនៅកម្ពុជាបន្ថែមទៀត។ លោកមើលឃើញចំពោះសក្តានុពលនៃកិច្ចសហប្រតិបត្តិការទូទាត់ឆ្លងដែនរវាង កម្ពុជា-ជប៉ុន តាមរយៈប្រព័ន្ធបាគង របស់ធនាគារជាតិនៃកម្ពុជា ផងដែរ។

លោកស្រីបណ្ឌិតទេសាភិបាល បានលើកឡើងពីការចូលរួមរបស់ ធនាគារឯកទេស អ៊ីអន ( ក្នុងសកម្មភាពសង្គមនាពេលកន្លងមក និងបានលើកទឹកចិត្តឱ្យបន្តចូលរួមកាន់តែច្រើនថែមទៀត ជាពិសេសកិច្ចសហការលើកកម្ពស់ចំណេះដឹងផ្នែកហិរញ្ញវត្ថុ។

ជាមួយគ្នានោះដែរ លោកស្រីបណ្ឌិត ជា សិរីក៏បានបញ្ជាក់ពីសារៈសំខាន់នៃការស្វែងយល់ឱ្យបានច្បាស់លាស់អំពីបទប្បញ្ញត្តិនានា មុននឹងដាក់ឱ្យដំណើរការផលិតផល ឬសេវាកម្មថ្មីណាមួយ ព្រមទាំងបានលើកទឹកចិត្តឱ្យមានការពិភាក្សាគ្នាលម្អិតជាមួយមន្រ្តីជំនាញរបស់ ធនាគាជាតិនៃកម្ពុជា ដើម្បីធានាបានអនុលោមភាពពេញលេញ។

កាលពីថ្ងៃទី១៨ ខែធ្នូ ឆ្នាំ២០២៣ លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា (NBC) និងលោក SAITO Ken រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុន បានចុះហត្ថលេខាលើអនុស្សរណៈនៃកិច្ចសហប្រតិបត្តិការស្តីពី«ការទូទាត់ដោយផ្អែកលើQR Code រួមគ្នា»។

ពិធីចុះហត្ថលេខានេះ ធ្វើឡើងក្រោមវត្តមានដ៏ខ្ពង់ខ្ពស់របស់លោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក Fumio Kishida នាយករដ្ឋមន្ត្រីនៃប្រទេសជប៉ុន ក្នុងកិច្ចប្រជុំកំពូលកម្ពុជា-ជប៉ុន ដែលបានធ្វើឡើងនៅទីក្រុងតូក្យូ ប្រទេសជប៉ុន ចាប់ពីថ្ងៃទី១៦ ដល់ថ្ងៃទី១៨ ខែធ្នូឆ្នាំ២០២៣។

យោងតាម NBC អនុស្សរណៈនៃកិច្ចសហប្រតិបត្តិការនេះត្រូវបានរៀបចំឡើងក្នុងគោលបំណងកំណត់ក្របខណ្ឌជាក់លាក់ សម្រាប់កិច្ចសហប្រតិបត្តិការលើកកម្ពស់សកម្មភាពប្រើប្រាស់ប្រព័ន្ធទូទាត់ឆ្លងដែនតាម QR Code ដ៏ងាយស្រួល មានសុវត្ថិភាព និងប្រសិទ្ធភាព។ ក្របខណ្ឌកិច្ចសហប្រតិបត្តិការនេះក៏នឹងជួយលើកកម្ពស់ចរាចរណ៍រូបិយវត្ថុជាតិ ព្រមទាំងជំរុញវិស័យទេសចរណ៍រវាងប្រទេសទាំងពីរឱ្យកាន់តែមានសក្តានុពលថែមទៀតផងដែរ៕