កម្ពុជារកចំណូលបានប្រមាណ ៩០ លានដុល្លារ ពីវិស័យរ៉ែ

វិស័យរ៉ែបានចូលរួមវិភាគទានជាចំណូលមិនមែនសារពើពន្ធ កើនដល់ប្រមាណជិត ៩០ លានដុល្លារអាមេរិក នៅឆ្នាំ ២០២៤ កើនឡើង ១៧០% ធៀបនឹងឆ្នាំ ២០២៣។ នេះបើយោងតាមរបាយការណ៍របស់ក្រសួងរ៉ែ និងថាមពល។

លោក កែវ រតនៈ រដ្ឋមន្ត្រីក្រសួងរ៉ែ និង​ថាមពល មានប្រសាសន៍នៅថ្ងៃទី ២១ ខែវិច្ឆិកា ឆ្នាំ ២០២៤ នេះថា តាមការប៉ាន់ស្មាន ចំណូលសារពើរពន្ធ នៃអាជីវកម្មរ៉ែមាស ទទួលបានប្រមាណ ៣១ លានដុល្លារ សម្រាប់ឆ្នាំ ២០២៤។

ដោយឡែកចំណូល ពីអាករលើការនាំចេញផលិតផលរ៉ែគ្រប់ប្រភេទនឹងអាចកើនដល់ប្រមាណ ៦១ លានដុល្លារនៅឆ្នាំ ២០២៤។

ក្រសួងរ៉ែ និង​ថាមពល បានផ្ដោតការយកចិត្តទុកដាក់បន្ថែមលើការធ្វើឱ្យមានតុល្យភាពជាងមុន ក្នុងការអភិវឌ្ឍវិស័យរ៉ែ និងការអភិរក្សធនធានធម្មជាតិ។

ក្រសួងរ៉ែ និង​ថាមពល បានរៀបចំសន្និបាតបូកសរុបលទ្ធផលការងារ ឆ្នាំ ២០២៣ និងឆ្នាំ ២០២៤ រយៈពេល ២ ថ្ងៃ ២០-២១ វិច្ឆិកា ឆ្នាំ ២០២៤ នៅសណ្ឋាគារសូហ្វីតែលភ្នំពេញភូគីត្រា ក្នុងនោះសម្ដេចធិបតី ហ៊ុន ម៉ាណែត បានអញ្ជើញ​បិទសន្និតបាតបូកសរុបលទ្ធផលការងាររបស់ក្រសួងរ៉ែនៅរសៀលថ្ងៃទី ២១​ ខែវិច្ឆិកា ឆ្នាំ ២០២៤ នេះផងដែរ៕

អត្ថបទ៖ ឡេង ដេត