កម្ពុជារកចំណូលសារពើពន្ធបានជាង ៨០ លានដុល្លារ ពីវិស័យថាមពល

គិតត្រឹមរយៈពេល ៧ ខែ ឆ្នាំ ២០២៤ វិស័យថាមពលផ្ដល់ចំណូលសារពើពន្ធប្រមាណ ៨០,១០ លានដុល្លារ និងបង្កើតការងារបានចំនួន ១៥ ៩៥៧ កន្លែង ក្នុងនោះអគ្គិសនីកម្ពុជា មាន​​បុគ្គលិកសរុប ៦ ២៣១ នាក់។ នេះបើយោងតាមក្រសួងរ៉ែង និងថាមពល។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល មានប្រសាសន៍នៅថ្ងៃទី ២១ ខែវិច្ឆិកា ឆ្នាំ ២០២៤ ថា ប្រភពអគ្គិសនីថ្មីចំនួន ១៣ គម្រោង ដែលមានអនុភាពសរុប ១ ២៧៥ មេហ្កាវ៉ាត់ កំពុង​សាងសង់ និងបន្ថែមចំនួន ២៣ គម្រោង សម្រាប់ឆ្នាំ ២០២៥-២០២៩ អានុភាពសរុប ៥ ៩៥០ មេហ្កាវ៉ាត់ ដើម្បីឈានទៅឱ្យបាន​៧០% ជាថាមពលស្អាតត្រឹមឆ្នាំ ២០៣០។

លោក កែវ រតនៈ បានបន្ថែមថា រដ្ឋាភិបាលបន្តឧបត្ថម្ភធនប្រមាណ ១២៥ លានដុល្លារ តាម​រយៈ​​អគ្គិសនី ដើម្បីឱ្យថ្លៃអគ្គិសនីនៅមានស្ថិរភាព ខណៈប្រទេសនានាកំពុងឡើង​ថ្លៃអគ្គិ​សនី ធ្វើ​ឱ្យ​អ្នកប្រើប្រាស់បណ្ដាញជាតិ ៩៩,៧៣% មានថ្លៃដូចគ្នាទូទាំងប្រទេស។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅក្នុងពិធី បិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងទិសដៅការងារឆ្នាំ២០២៥​ របស់ក្រសួងរ៉ែ និងថាមពលថា វិស័យថាមពលត្រូវ​បាន​កំណត់​​​អាទិភាពក្នុងយុទ្ធសាស្ត្របញ្ចកោណដំណាក់កាលទី១ ដែលថាមពលមានសារៈសំខាន់​ក្នុង​​សេដ្ឋកិច្ច និងសង្គម ដែលបានបម្រើឱ្យជីវភាពប្រចាំថ្ងៃ និងបម្រើឱ្យការអភិវឌ្ឍរបស់វិស័យ​ផ្សេងៗ​ក្នុងប្រទេស។

សម្ដេច ហ៊ុន ម៉ាណែត បានបន្តថា ការគ្រប់គ្រង និងអភិវឌ្ឍវិស័យ​ថា​មពល​ ជា​គន្លឹះ​ដ៏សំខាន់ សម្រាប់ជំរុញកំណើនសេដ្ឋកិច្ច។

ការប្រើប្រាស់ថាមពលអគ្គិសនីនៅទូទាំងប្រទេស បានកើនឡើង ១៥,៥៦% នៅឆ្នាំ ២០២៤ ធៀប​នឹងឆ្នាំ ២០២៣ ក្នុងនោះ ៨៦,៦៧% ជាបរិមាណថាមពលដែលផលិតក្នុងស្រុក និង ១៣,៣% នាំចូល។

សម្ដេចធិបតី ហ៊ុន ម៉ាណែត បានបញ្ជាក់ថា ការខិតខំប្រឹងប្រែងអភិវឌ្ឍខ្សែបណ្ដាញ​រហូតមក​ដល់ពេល​នេះ បានធ្វើឱ្យវិសាលភាពនៃការផ្គត់ផ្គង់អគ្គិសនីពីប្រព័ន្ធបណ្ដាញជាតិ​បានគ្រប​ដណ្ដប់​​​​​លើភូមិ ៩៩,១៥% ទូទាំងប្រទេស៕

អត្ថបទ៖ ឡេង ដេត