ការប្រមូលពន្ធលើមធ្យោបាយដឹកជញ្ជូន បិទបញ្ចប់នៅសប្ដាហ៍ក្រោយ

អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុបានប្រកាសថា ម្ចាស់យានយន្តនឹង​ត្រូវទទួល​រងនូវ​ពិន័យ តាមច្បាប់ ក្នុងករណីខកខានមិនបានបង់ពន្ធទាន់ពេលវេលាកំណត់ ខណៈការប្រមូល​ពន្ធលើ​មធ្យោ​បាយដឹកជញ្ជូនសម្រាប់​ឆ្នាំ២០២៤ នឹងបិទបញ្ចប់នៅថ្ងៃទី ៣០ ខែវិច្ឆិកា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់យានយន្តអាចធ្វើការបង់ពន្ធនៅអគ្គនាយកដ្ឋានពន្ធដារ ឬនៅសាខាពន្ធដារខេត្ត-ខណ្ឌ ឬនៅធនាគារ​កាណាឌីយ៉ា, ធនាគារអេស៊ីលីដា, ធនាគារវឌ្ឍនៈ, ធនាគារកម្ពុជាសាធារណៈ, ធនាគារជេ ត្រាស់ រ៉ូយ៉ាល់, ធនាគារស្ថាបនា, ធនាគារប្រៃសណីយ៍កម្ពុជា, ធនាគារវឌ្ឍនៈ, ធនាគារពាណិជ្ជកម្មក្រៅប្រទេស, ធនាគារវីង ឬនៅតាម ធនាគារដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ចនិងហិរញ្ញវត្ថុ ឬអាចបង់តាមរយៈកម្មវិធី “GDT Taxpayer App” ដែលអាចទាញយកចេញពី App Store ចំពោះ iOS ឬ Play Store ចំពោះ Android សម្រាប់ យានយន្តដែលធ្លាប់បាន​ប្រកាសបង់ពន្ធ​លើ​មធ្យោបាយដឹកជញ្ជូនកន្លងមក។

សូមជំរាបថា ការប្រមូលពន្ធយានយន្ត បានចាប់​ផ្តើម​ពីថ្ងៃទី០១ ខែមិថុនា រហូតដល់ថ្ងៃទី៣០ ខែវិច្ឆិកា ឆ្នាំ២០២៤ ហើយអគ្គនាយកដ្ឋាន​ពន្ធដារ​នឹង​​សហការជាមួយអាជ្ញាធរមានសមត្ថកិច្ច ជាពិសេសនគរបាលចរាចរណ៍ និងកងរាជ​អាវុធ​ហត្ថ ដើម្បីចុះត្រួតពិនិត្យការអនុវត្តប្រមូលពន្ធនេះនៅតាមដងផ្លូវនានា បន្ទាប់​ពីបិទ​បញ្ចប់​ការ​ប្រមូល​ពន្ធ​នៅថ្ងៃទី៣០ ខែវិច្ឆិកា ឆ្នាំ២០២៤៕

អត្ថបទ៖ ឡេង ដេត