ព័ត៌មានអន្ដរជាតិ

ឥណ្ឌូណេស៊ីបង្កកគណនីធនាគារជាង ៧ ០០០ ពាក់ព័ន្ធនឹងល្បែងអនឡាញ

បានផុស

៤ ខែ មុន

នៅ

ថ្ងៃសៅរ៍ ២៣ វិច្ឆិកា ២០២៤

ដោយ

អាជ្ញាធរឥណ្ឌូណេស៊ី បានបង្កកគណនីធនាគារប្រហែល ៧ ៥០០ គណនី ដែលប្រើប្រាស់ដោយក្រុមឧក្រិដ្ឋជនរៀបចំប្រតិបត្តិការល្បែងស៊ីសងតាមអនឡាញ និងអ្នកពាក់ព័ន្ធ។ នេះបើតាមការឱ្យដឹងរបស់មន្ត្រីជាន់ខ្ពស់នៃធនាគារកណ្តាលឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ ទេសាភិបាលរងនៃធនាគារឥណ្ឌូនេស៊ី (BI) លោក Juda Agung បានប្រាប់អ្នកយកព័ត៌មានថា ធនាគារកណ្តាលកំពុងចាត់វិធានការយ៉ាងសកម្មដើម្បីធានាថា ប្រព័ន្ធទូទាត់ប្រាក់ មិនត្រូវបានប្រើប្រាស់ដោយខុសច្បាប់ ឬប្រើប្រាស់ដើម្បីជួយសម្រួលដល់សកម្មភាពខុសច្បាប់ រួមទាំងល្បែងស៊ីសងតាមអ៊ិនធឺណិត។

គួរគូសបញ្ជាក់ថា ឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ កំពុងបង្កើនវិធានការដើម្បីប្រយុទ្ធប្រឆាំងនឹងការលេងល្បែងស៊ីសងតាមប្រព័ន្ធអ៊ិនធឺណិត ខណៈចំនួនប្រតិបត្តិការដែលគេសង្ស័យថាពាក់ព័ន្ធនឹងសកម្មភាពល្បែងនេះ កំពុងកើនឡើងនៅទូទាំងប្រទេស។

ការលេងល្បែងស៊ីសងទាំងក្នុងអនឡាញ និងក្រៅអនឡាញ គឺជាអំពើខុសច្បាប់នៅឥណ្ឌូណេស៊ី។ អ្នកលេង ឬអ្នកពាក់ព័ន្ធរៀបចំការលេង អាចរងការកាត់ទោសឱ្យជាប់ពន្ធនាគារអតិបរមា ១០ ឆ្នាំ និងពិន័យជាប្រាក់ ២៥ លានរូពី ឥណ្ឌូណេស៊ី (ប្រហែល ១ ៥៧៥ ដុល្លារអាមេរិក)។

ក្នុងប្រតិបត្តិការបង្រ្កាបចុងក្រោយនេះ កាលពីថ្ងៃសៅរ៍សប្តាហ៍មុន ប៉ូលិសក្រុងហ្សាការតា បានឃុំខ្លួនជនសង្ស័យជាង ២០ នាក់ពីបទជាប់ពាក់ព័ន្ធនឹងការលេងល្បែងអនឡាញ៕