ស្ពានឆ្លងកាត់ទន្លេមេគង្គក្រចេះ សាងសង់​សម្រេច​បានប្រមាណជាង ៧៦%

គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់» គិតត្រឹមខែវិច្ឆិកា ឆ្នាំ២០២៤ សម្រេចបាន ៥៣,៤៥% នៃវឌ្ឍនភាពទាំងមូល។ នេះបើ​តាមការឲ្យដឹងពីមន្ត្រីនៃមន្ទីរសាធារណៈការ និងដឹកជញ្ជូនខេត្តក្រចេះ។

គម្រោងរួមមាន ហេដ្ឋារចនាសម្ព័ន្ធដូចជា ស្ពានឆ្លងកាត់ទន្លេមេគង្គខេត្តក្រចេះមានប្រវែង ១,៧៦១ម៉ែត្រ ស្ថិតនៅស្រុក​ចិត្របុរី និងស្រុកព្រែកប្រសព្វ និងផ្លូវតភ្ជាប់ និងផ្លូវខ្នែងទៅកាន់ក្រុងក្រចេះ មានប្រវែងសរុប ៣៣,៤៥៩ គីឡូម៉ែត្រ។

ដោយឡែក គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ ប្រវែង ១,៧៦១ម៉ែត្រ សម្រេចបានប្រមាណជាង ៧៦.៣៩% គ្រោងបញ្ចប់ការសាងសង់ឱ្យបានមុនខែកញ្ញា ឆ្នាំ២០២៦ ខាងមុខនេះ។

គម្រោងស្ពានឆ្លងកាត់ទន្លេមេគង្គ និងផ្លូវតភ្ជាប់ខេត្តក្រចេះ បាន​បើក​ការដ្ឋានសាងសង់​កាលពីថ្ងៃទី ០២ ខែមករា ឆ្នាំ ២០២៣ ដោយប្រើ​ប្រាស់​រយៈពេលសាងសង់ចំនួន ៤២ ខែ គ្រោង​បញ្ចប់ឱ្យបានមុនខែកញ្ញា ឆ្នាំ ២០២៦ ដោយ​ចំណាយថវិកាសរុបប្រមាណជាង ១១៤ លានដុល្លារអាមេរិក៕

អត្ថបទ៖ ប្រុញ វិធិន