ចិន​អនុញ្ញាត​ឱ្យ​ក្រុមហ៊ុនចម្រាញ់ប្រេងឯករាជ្យ​ អាច​បង្កើន​កូតានាំចូលប្រេងឆៅ​ ​

ប្រទេសចិនបានចេញកូតានាំចូលប្រេងឆៅបន្ថែម យ៉ាងហោចណាស់ ៥,៨៤ លាន​តោន​ (១១៦ ៨០០ បារ៉ែល/ថ្ងៃ​) ​ដល់ក្រុមហ៊ុនចម្រាញ់ប្រេង​ឯករាជ្យ សម្រាប់​ប្រេង​ដែល​ត្រូវ​ដឹក​ទៅ​ដល់ចិន​នៅចុង​ឆ្នាំ​ ២០២៤ និងដើមឆ្នាំ ២០២៥​។ នេះ​បើ​តាម​ការ​ចុះ​ផ្សាយ​របស់​ទីភ្នាក់ងារសាររ៉យទ័រ​ ដែល​ស្រង់សម្ដី​ប្រភព​ដឹង​ច្បាស់​ពី​បញ្ហា​នេះ​។ ​

កូតាថ្មី​ ​រំពឹងថានឹងបង្កើនការនាំចូលប្រេងឆៅរបស់ប្រទេសចិននៅឆ្នាំក្រោយ បន្ទាប់ពីវា​ស្ទុះងើបឡើងវិញក្នុងខែវិច្ឆិកា ដែលជំរុញដោយការធ្លាក់ចុះ​នៃ​តម្លៃ​ដឹក​ចេញ​ពី​អ៊ីរ៉ាក់ និងអារ៉ាប៊ីសាអូឌីត។ យុទ្ធសាស្រ្ត​​របស់ចិនក្នុងការគ្រប់គ្រង​ការនាំចូលប្រេងដដែល​ រំពឹង​ថា​នឹង​ចាប់​ដ្ដើមនៅចុង​ឆ្នាំ​នេះ។

ក្រសួងពាណិជ្ជកម្មចិន ដែលគ្រប់គ្រងកូតានាំចូលប្រេងឆៅ មិន​បាន​ប្រកាស​យ៉ាងណា​ទេ​ ជុំវិញ​បញ្ហា​នេះ​។

គួរគូស​បញ្ជាក់ថា​ ក្រុមហ៊ុនចម្រាញ់ប្រេងឯករាជ្យមួយចំនួន ដែលជួបបញ្ហាប្រាក់ចំណេញទាបដោយសារតម្រូវការធ្លាក់ចុះនៅឆ្នាំនេះ បានត្អូញត្អែរអំពី​កង្វះ​កូតានាំចូលគ្រប់គ្រាន់ ដើម្បីទទួលបានវត្ថុធាតុដើមដែល​ខ្លួន​ត្រូវការសម្រាប់ផលិតកម្ម។ ទោះជាយ៉ាងណាក៏ដោយ ក្នុងរយៈពេល ៣​ សប្តាហ៍ចុងក្រោយនេះ អត្រាប្រតិបត្តិការរបស់ពួកគេបានកើនឡើង ​ហើយប្រាក់ចំណេញ​ក៏​ប្រសើរឡើង ដោយសារតែកំណើន​នៃ​​ផលិត​កម្ម​ប្រេង​ ​និងប្រេងម៉ាស៊ូត​។ ​

​ចិនបានកំណត់កូតានាំចូលប្រេងឆៅចំនួន ២៤៣ ​លានតោនសម្រាប់ក្រុមហ៊ុន​ដែល​មិន​គ្រប់គ្រង​ដោយ​រដ្ឋ ក្នុងឆ្នាំ ២០២៤ និងបង្កើនវាដល់ ២៥៧ ​លានតោនសម្រាប់ឆ្នាំ ​២០២៥​៕