តម្លៃដំឡូងមីធ្លាក់ចុះ ដោយសារតម្រូវការនាំចេញទាប

បច្ចុប្បន្នតម្លៃដំឡូងមីបានធ្លាក់ចុះបន្តិចបើធៀបនឹងឆ្នាំ ២០២៣ ដោយសារតម្រូវការនាំចេញទាប ខណៈស្ដុកចាស់នៅសល់កាលពីឆ្នាំមុននៅតាមបណ្ដាប្រទេសដែលនាំចូលពីកម្ពុជា។

លោក អិល ឈិញ ប្រធានសមាគម​កសិករ​ដំឡូងមីខ្មែរ ប្រាប់កម្ពុជាថ្មី នៅថ្ងៃទី ២៦ ខែវិច្ឆិកា ឆ្នាំ ២០២៤ ថា តម្លៃដំឡូងមីបានធ្លាក់ចុះ ដោយសាររោងចក្រមួយចំនួន មិនមានតម្រូវការដំឡូង​ ខណៈ​ស្ដុកចាស់​នៅសល់ច្រើន រួមផ្សំនឹងការរកឃើញសម្ភារមួយចំនួនដែល​ផលិតជំនួស​ដំឡូង​មី​បាន​ដែលធ្វើឱ្យតម្រូវការដំឡូងមីធ្លាក់ចុះទាប​​។

លោក អិល ឈិញ ថ្លែងថា៖ «តម្លៃដំឡូងមីអត់ល្អទេឥឡូវ តំបន់ខ្លះថ្លៃ ២០០ រៀល ក្នុងមួយ​គីឡូ​ក្រាម តំបន់ខ្លះ ៣០០ រៀល នៅខេត្តបាត់ដំបង ប៉ៃលិន តម្លៃបាន ២០០ រៀល ខេត្តឧត្តរមានជ័យបាន ២៣០ រៀល ក្នុងមួយគីឡូក្រាម ជាធម្មតាទាល់តែបាន ៣០០ រៀល បានយើងចំណេញ បើយើងបានតែ ២០០ រៀល អត់ចំណេញទេ កសិករខាតរាល់ថ្ងៃហ្នឹង»។

យោងតាមធនាគារ​អភិវឌ្ឍន៍ជនបទ និង​កសិកម្ម​ (ARDB) នៅក្នុងរយៈពេល៩ខែឆ្នាំ២០២៤នេះ កម្ពុជាបាននាំចេញដំឡូងមីស្រស់ចំនួនជាង ២,៤ លាន​តោន (២,៤៥៨,៣៦០) កើនឡើង ១៦២,៥៣% បើធៀបរយៈពេលដូចគ្នាកាលពីឆ្នាំមុន។

ឆ្នាំ២០២៣ កម្ពុជា​នាំ​ចេញដំឡូងមីស្រស់ ដំឡូមីក្រៀម និងម្សៅដំឡូងមី សរុបជាង៣លាន​តោនរួមមាន ដំឡូងមីស្រស់ចំនួន ១,៩៦ លានតោន កើនឡើង ២៦.៥១%, ចំណិត​ដំឡូង​មី​​ក្រៀមមានចំនួន ១,២៩ លានតោន ធ្លាក់ចុះ ៣៧.៦៤%, ម្សៅដំឡូងមី​មាន​ចំនួនជាង ៣ សែន ៦ ម៉ឺនតោន ធ្លាក់ចុះ​៤៥.៣៩%៕

អត្ថបទ៖ ឡេង ដេត