ព័ត៌មានអន្ដរជាតិ

ផលិតកម្មរថយន្តថៃ ធ្លាក់ចុះធ្ងន់ធ្ងរ ជំរុញដោយកម្ចីមិនដំណើរការក្នុងស្រុក និងជម្លោះអន្តរជាតិ

បានផុស

២ ខែ មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

ក្លឹបឧស្សាហកម្មយានយន្តនៃសហព័ន្ធឧស្សាហកម្មថៃ (FTI) បានឱ្យដឹងកាលពីថ្ងៃចន្ទថា ផលិតកម្មរថយន្តរបស់ប្រទេសថៃបានធ្លាក់ចុះយ៉ាងធ្ងន់ធ្ងរដល់ ១៩,២៨ ភាគរយ ក្នុងរយៈពេល ១០ ខែដើមឆ្នាំ ២០២៤ ដោយធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់កាសែត The Nation ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានក្លឹប លោក Surapong Paisitpattanapong បាននិយាយថា ចាប់ពីខែមករា ដល់ខែតុលា ថៃបានផលិតរថយន្តប្រមាណ ១,២៤ លានគ្រឿង ដោយជាង ៣៨០ ០០០ គ្រឿងសម្រាប់លក់ក្នុងស្រុក និងជាង ៨៦០ ០០០ គ្រឿងសម្រាប់ការនាំចេញ។

ការលក់ក្នុងស្រុកក៏ធ្លាក់ចុះដូចគ្នា ដោយគិតតែក្នុងខែតុលា ការលក់រថយន្តថៃបានធ្លាក់ចុះ ៣៦ ភាគរយ ធៀបនឹងខែកញ្ញា និងដល់ចំណុចទាបបំផុតរាប់តាំងពីសម័យបិទខ្ទប់នៃវិបត្តិកូវីដ។

លោក Surapong បានលើកឡើថា ការធ្លាក់ចុះនៃការលក់ និងការផលិតរថយន្ត បណ្ដាលមកពីការរឹតត្បឹតលើការផ្ដល់ប្រាក់កម្ចីទិញរថយន្តពីស្ថាប័នហិរញ្ញវត្ថុ ដើម្បីទប់ទល់នឹងបញ្ហាកម្ចីមិនដំណើរការ (NPLs)។ ការនាំចេញរថយន្តរបស់ថៃ ក៏បានធ្លាក់ចុះផងដែរ ដោយសារតែឥទ្ធិពលនៃសង្គ្រាមអ៊ីស្រាអែល-ហាម៉ាស និងរុស្ស៊ី-អ៊ុយក្រែន ដែលបានកាត់បន្ថយតម្រូវការរថយន្តនៅក្នុងប្រទេសមួយចំនួន ដែលជាទីផ្សាររបស់ថៃ។

ប្រធាន FTI លោក Kriengkrai Thiennukul មានថ្លែងថា ការថយចុះនៃផលិតកម្មរថយន្តទំនងជាប៉ះពាល់ដល់ប្រតិបត្តិករក្នុងខ្សែចង្វាក់ផ្គត់ផ្គង់ ដែលភាគច្រើនជាក្រុមហ៊ុនផលិតគ្រឿងបន្លាស់។ លោកបានបន្តថា៖ «យើងអាចឃើញរោងចក្រគ្រឿងបន្លាស់កាត់បន្ថយថ្ងៃធ្វើការពី ៣ ថ្ងៃក្នុងមួយសប្តាហ៍ មកត្រឹមតែ ២ ថ្ងៃក្នុងមួយសប្តាហ៍»៕