កសិករលើកឡើងថា តម្លៃទីផ្សារគោបន្តធ្លាក់ចុះ

កសិករចិញ្ចឹមគោស្ថិតភូមិធ្នង់ ឃុំគរ ខេត្តត្បូងឃ្មុំ បានអះអាងថា សម្រាប់ឆ្នាំ២០២៤នេះ ទីផ្សារគោមានការធ្លាក់ថ្លៃ ខណៈតម្លៃលក់ក្នុងទីផ្សារមិនបានចំណេញ តែអ្វីដែលមិនបោះបង់គឺកសិករនៅតែនាំគ្នាចិញ្ចឹម ពីព្រោះនេះជាមុខរបរតាំងមកពីជំនាន់ដូនតាមកម្ល៉េះ។

លោក ម៉េត ម៉ែង អាយុ៥៨ឆ្នាំ រស់នៅភូមិធ្នង់បានបញ្ជាក់ឱ្យដឹងថា រូបលោកបានចិញ្ចឹមគោជាង១០ឆ្នាំមកហើយ បច្ចុប្បន្នលោកមានគោចំនួនជាង៣០ក្បាល។ លោកបន្តថា ក្នុងមួយឆ្នាំកសិករអាចលក់បានម្តង តម្លៃគោតាមមាឌ តូច ធំ បើធំតម្លៃ១លានរៀល តូចតម្លៃ៦០ម៉ឺនរៀលតែប៉ុណ្ណោះ ហេតុនេះហើយការចិញ្ចឹមគោសព្វថ្ងៃនេះ គឺមិនបានចំណេញអ្វីនោះទេ តែមុខរបរធ្លាប់មានហើយចេះតែផ្សំៗគ្នា ជាជាងទំនេរ។

លោក ម៉េត ម៉ែង បានបន្ថែមទៀតថា ចំពោះបញ្ហាស្មៅវិញក៏រៀងពិបាកបន្តិច បច្ចុប្បន្នការចិញ្ចឹមគោត្រូវឱ្យវាស៊ីស្មៅនៅតាមចំការស្វាយចន្ទីរបស់ក្រុមហ៊ុន តែដល់ខែបាញ់ថ្នាំ វានាំឱ្យប្រឈមនឹងការបង្កកំណើត កូនគោច្រើនមិនសូវលូតលាស់ តូចៗ។ កសិករូបនេះ អះអាងទៀតថា ផលគោលក់បានមិនចំណេញ តែកសិករចេះតែផ្សំជាមួយការងារស្រែចំការ ទើបអាចផ្គត់ផ្គង់គ្រួសារបាន។

ជាមួយគ្នានោះ លោកស្រី មុំ វ៉ាន់នាត មេភូមិធ្នង់ ក៏បានបញ្ជាក់ឱ្យដឹងដែរថា ភូមិមានប្រជាពលរដ្ឋចំនួន២១៦គ្រួសារ កសិករចិញ្ចឹមគោមានចំនួន៣០គ្រួសារ សរុបគោមានជាង៥០០ក្បាល។

ការចិញ្ចឹមគោជាលក្ខណៈគ្រួសារនេះ ឃើញពួកគាត់ចិញ្ចឹមប្រវាស់ខ្លះ ពូជខ្លួនឯងខ្លះទៅ ទៅតាមលទ្ធភាព មើលទៅដូចមិនសូវរីកចម្រើនប៉ុន្មានទេ ដោយទីផ្សារគោចុះថោកពេក ហេតុនេះ ការចិញ្ចឹមពង្រីករបស់កសិករមិនមានច្រើននោះទេ ដោយហេតុថា អត់បានផលចំណេញអ្វីច្រើន៕

អត្ថបទ៖ សាន វិឡែម