កម្ពុជាប្រឆាំងសកម្មភាពខុសច្បាប់ ក្នុងទីផ្សារជួញដូរវត្ថុបុរាណ

កម្ពុជានៅថ្ងៃទី ២៧ ខែវិច្ឆិកា ឆ្នាំ ២០២៤ បានធ្វើជាម្ចាស់ផ្ទះរៀបចំសន្និសីទថ្នាក់តំបន់ស្តីពី “ការប្រឆាំងការសម្អាតប្រាក់ និង​ហិរញ្ញប្បទានប្រឆាំងភេរវកម្ម ពាក់ព័ន្ធនឹងបទល្មើសជួញដូរវត្ថុបុរាណ និងសម្បត្តិបេតិកភណ្ឌ” នៅខេត្តសៀមរាប ដែលមានមន្ត្រី និងអ្នកជំនាញជាតិ-អន្តរជាតិចចូលរួម។

លោកស្រី ជា សិរី ទេសាភិបាល ធនាគារជាតិនៃកម្ពុជា បានថ្លែងថា៖ «សន្និសីទថ្នាក់តំបន់នេះ គឺជាវេទិកាដ៏មានសារៈ​សំខាន់សម្រាប់អ្នកចូលរួមផ្លាស់ប្តូរព័ត៌មាន និងចែករំលែកឧត្តមានុវត្តក្នុងការប្រឆាំងសកម្មភាពខុសច្បាប់នៅក្នុងទីផ្សារ​ជួញ​ដូរវត្ថុបុរាណ និងសម្បត្តិបេតិកភណ្ឌ ព្រមទាំងពង្រឹងកិច្ចសហប្រតិបត្តិការរវាងស្ថាប័នពាក់ព័ន្ធ»។

សន្និសីទនេះគឺជាព្រឹត្តការណ៍សកលលើកទី៣ ដែលត្រូវបានរៀបចំឡើងដោយ EU Global Facility ក្រោមកិច្ចសហការជាមួយ ក្រុមប្រទេសអាស៊ីប៉ាស៊ីហ្វិកស្តីពីការសម្អាតប្រាក់ (APG) និងអង្គភាពស៊ើបការណ៍ហិរញ្ញវត្ថុកម្ពុជា (CAFIU) បន្ទាប់ពីលើកទី ១ រៀបចំនៅប្រទេសអេហ្ស៊ីប និងលើកទី២ នៅប្រទេសម៉ិកស៊ិក​។

សន្និសីទនេះមានគោលបំណងពង្រឹងកិច្ចសហប្រតិបត្តិការអន្តរស្ថាប័ន និងចែករំលែកចំណេះដឹង ក្នុងការតាមដាននិងស៊ើបអង្កេតសកម្មភាពជួញដូរខុសច្បាប់ ដើម្បីការពារសម្បត្តិវប្បធម៌។

ក្នុងសន្និសីទនេះក៏មានការចូលរួមជាគណធិបតីពីលោក Igor Driesmans ឯកអគ្គរដ្ឋទូតនៃសហភាពអឺរ៉ុប ប្រចាំព្រះរាជាណាចក្រកម្ពុជា ព្រមទាំងតំណាងក្រសួងយុត្តិធម៌ និង​​ក្រសួងវប្បធម៌ និងវិចិត្រសិល្បៈផងដែរ៕