ព័ត៌មានអន្ដរជាតិ

ឥណ្ឌូណេស៊ីគ្រោងឈប់នាំចូលអំបិលសម្រាប់ការប្រើប្រាស់ ចាប់ពីឆ្នាំ ២០២៥

បានផុស

៥៩ វិនាទី មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

ឥណ្ឌូណេស៊ីនឹងបញ្ឈប់ការនាំចូលអំបិលសម្រាប់ប្រើប្រាស់ចាប់ពីឆ្នាំក្រោយ ស្របតាមបទបញ្ជាប្រធានាធិបតី (Perpres) ស្តីពីឧស្សាហកម្មអំបិលជាតិ។ នេះបើតាមការចុះផ្សាយរបស់កាសែត Jakarta Globe កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធាននាយកដ្ឋានកិច្ចការស្បៀងអាហារ លោក Zulkifli Hasan (Zulhas) បានថ្លែងនៅក្នុងសន្និសីទសារព័ត៌មាននៅក្រសួងកិច្ចការសមុទ្រ និងនេសាទ ថា៖ «យើងនឹងលែងនាំចូលអំបិលសម្រាប់ការប្រើប្រាស់ទៀតហើយ ចាប់ពីឆ្នាំក្រោយតទៅ។ វាគឺជាការទទួលខុសត្រូវដ៏ធំមួយ»។

បទបញ្ជាប្រធានាធិបតី បានបែងចែកខុសគ្នារវាងអំបិលសម្រាប់ការប្រើប្រាស់ និងអំបិលសម្រាប់គោលបំណងឧស្សាហកម្ម។ ក្រៅតែបញ្ឈប់ការនាំចូលអំបិកប្រើប្រាស់ លោក Zulhas បានលើកឡើងផងដែរថា រដ្ឋាភិបាលគ្រោងនឹងបញ្ឈប់ការនាំចូលអំបិលឧស្សាហកម្ម ក្នុងរយៈពេល២ឆ្នាំ។ លោកថ្លែងយ៉ាងដូច្នេះថា៖ «ក្នុងរយៈពេល២ឆ្នាំ យើងក៏នឹងរំពឹងថា ក្រសួងកិច្ចការសមុទ្រនឹងគ្រប់គ្រងការផលិតអំបិលឧស្សាហកម្ម។ យើងត្រូវតែផលិតវាក្នុងស្រុក។ ដូច្នេះ ២ឆ្នាំចាប់ពីពេលនេះតទៅ យើងនឹងមិននាំចូលអំបិលសម្រាប់ឧស្សាហកម្មទៀតនោះទេ»។

គោលនយោបាយទាក់ទងនឹងអំបិលនេះ គឺជាផ្នែកមួយនៃចក្ខុវិស័យគ្រប់ជ្រុងជ្រោយរបស់រដ្ឋាភិបាលឥណ្ឌូណេស៊ី ក្នុងការសម្រេចបាននូវការផ្គត់ផ្គង់ស្បៀងខ្លួនឯងដោយគ្រប់គ្រាន់ នៅឆ្នាំ ២០២៧។

គេមើលឃើញថា ទោះបីជាជាឥណ្ឌូណេស៊ីពេញទៅដោយប្រជុំកោះដែលមានឆ្នេរសមុទ្រព័ទ្ធជុំវិញគ្រប់ទិសក៏ដោយ ក៏ប្រទេសនេះនៅតែពឹងផ្អែកលើការនាំចូលអំបិល។ យោងតាមទិន្នន័យចុងក្រោយពីទីភ្នាក់ងារស្ថិតិកណ្តាល (BPS) ឥណ្ឌូណេស៊ីបាននាំចូលអំបិលចំនួន ២,៨ លានតោន ក្នុងឆ្នាំ ២០២៣ នៅតម្លៃ ១,៣៥ ទ្រីលានរូពៀ៕