សេដ្ឋកិច្ច

អ្នកដំណើរតាមជើងហោះហើរ កម្ពុជា-ចិន ជាង ៧៣ ម៉ឺននាក់ ក្នុងរយៈពេល ១០ ខែ

បានផុស

២ ខែ មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

គិតចាប់ពីខែមករា ដល់ខែតុលា ឆ្នាំ ២០២៤ មានអ្នកដំណើរជាង ៧៣ ម៉ឺននាក់ (៧៣៣ ៧២៩) បានធ្វើដំណើរចេញ-ចូលតាមផ្លូវអាកាសរវាងកម្ពុជា-ចិន កើនឡើង ៨៣ ភាគរយ ធៀបនឹងរយៈពេលដូចគ្នានៅឆ្នាំ ២០២៣។ នេះបើយោងតាមរដ្ឋលេខាធិការដ្ឋានអាកាសចរណ៍ស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋលេខាធិការដ្ឋានអាកាសចរណ៍ស៊ីវិល បង្ហាញថា នៅក្នុងរយៈពេល ១០ខែចំនួនជើងហោះហើររវាងកម្ពុជា-ចិន សរុប ៥ ៤៨៦ ជើង កើន ៦០ ភាគរយ និងទំនិញចំនួន ៦ ៣៤១ តោន កើនឡើង ៣៨ ភាគរយ។

លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិក (PATA) សាទរចំពោះកំណើនអ្នកដំណើរចេញ-ចូលតាមជើងហោះហើរ តែលោកបានផ្ដល់យោបល់ឱ្យរដ្ឋាភិបាល និងវិស័យឯកជនត្រូវខិតខំប្រឹងប្រែងបន្ថែមទៀត នៅចំពេលដែលពិភពលោកកាន់តែរួមតូចនៅក្នុងទីផ្សារ ដែលមានការប្រកួតប្រជែង។

កម្ពុជាស្នើឱ្យភាគីចិនបង្កើនការហោះហើរកាន់តែច្រើន ខណៈកម្ពុជាមានជើងហោះហើរនៅអាកាសយានដ្ឋានអន្តរជាតិភ្នំពេញតភ្ជាប់ ៩ ទីក្រុងនៅប្រទេសចិន ដែលទទួលបានជើងហោះហើរចំនួន ៩២ ក្នុងមួយសប្ដាហ៍។

យោងតាមរដ្ឋលេខាធិការដ្ឋានអាកាសចរណ៍ស៊ីវិល គិតចាប់ពីខែមករា ដល់ខែតុលា កម្ពុជាទទួលបានជើងហោះហើរចេញ-ចូល (ទ្វេទិស) ចំនួនជិត ៥ ម៉ឺនជើង (៤៧ ៤៤៧) កើនឡើង ១៤ ភាគរយ។

អ្នកដំណើរចេញ-ចូល ជិត ៥ លាននាក់ កើនឡើង ២១ ភាគរយ និងទំនិញតាមផ្លូវអាកាសចេញ-ចូលជាង ៦ ម៉ឺនតោន កើនឡើង ៣៧ ភាគរយ៕