ក្រុមហ៊ុនចិនស្វែងរកឱកាសវិនិយោគនៅកម្ពុជា

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជានៅថ្ងៃទី ២៨ ខែវិច្ឆិកា ឆ្នាំ ២០២៤ បានជួបពិភាក្សាការងារជាមួយគណៈប្រតិភូនៃវិទ្យាស្ថានពាណិជ្ជកម្ម ជឹង គង់ (Cheung Kong Graduate School of Business_CKGSB) ដឹកនាំដោយលោក Jiang YiFei នាយកគ្រប់គ្រងវិទ្យាស្ថាន ក្រោមការសម្របសម្រួលពីអ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា ដើម្បីស្វែងរកឱកាសវិនិយោគនៅកម្ពុជា។

លោកឧបនាយករដ្ឋមន្ត្រីបានលើកឡើងពីសុខសន្តិភាព, ស្ថិរភាព, កាលានុវត្តភាពវិនិយោគរបស់កម្ពុជា, វិស័យជាអាទិភាព, ផែនការមេ, កិច្ចសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា, និងចក្ខុវិស័យរបស់រាជរដ្ឋាភិបាលកម្ពុជាក្នុងការគាំទ្រធុរកិច្ច និងធានាប្រក្រតីភាពនៃកិច្ចវិនិយោគរបស់វិនិយោគិន។

លោកនាយកគ្រប់គ្រងវិទ្យាស្ថានបានថ្លែងការកោតសរសើរចំពោះ លោកឧបនាយករដ្ឋមន្ត្រី ដែលបានជម្រាបជូនគណៈប្រតិភូយ៉ាងក្បោះក្បាយ និងប្រកបដោយថាមពលអំពីកាលានុវត្តភាពវិនិយោគនៅកម្ពុជា។ ក្នុងនោះ លោកបានមើលឃើញអំពីភាពរីកចម្រើនយ៉ាងឆាប់រហ័សរបស់កម្ពុជា ពិសេសលើការអភិវឌ្ឍផ្នែកបច្ចេកវិទ្យាដែលនឹងអាចឈានទៅមានសមត្ថភាពពេញលេញនាពេលឆាប់ៗខាងមុខនេះ។

បន្ថែមពីនេះ លោកនាយក ក៏បានស្នើសុំការណែនាំបន្ថែមទៀតពីលោកឧបនាយករដ្ឋមន្ត្រី លើកិច្ចការងារកម្មសិទ្ធបញ្ញា, ស្ថានភាពទីផ្សារពាណិជ្ជកម្មតាមប្រព័ន្ធអេឡិចត្រូនិក (E-commerce), និងកិច្ចវិនិយោគលើវិស័យថាមពលជាដើម៕