ជំនួបផ្លាស់ប្តូរពាណិជ្ជកម្មទេសចរណ៍កម្ពុជា ជំរុញការត​ភ្ជាប់កញ្ចប់ទស្សនកិច្ចទេសចរណ៍អន្តរជាតិ

ក្រសួងទេសចរណ៍សហការជាមួយសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) នឹង រៀប​ចំកម្មវិធីជំនួបផ្លាស់ប្តូរពាណិជ្ជកម្មទេសចរណ៍កម្ពុជាអំឡុងពេលពិធីបុណ្យសមុទ្រលើកទី ១១ រយៈ​ពេល ៣ ថ្ងៃ ចាប់ពីថ្ងៃទី ១៤ ដល់ថ្ងៃទី ១៥ ខែធ្នូ ឆ្នាំ ២០២៤ នៅសណ្ឋាគារ ហ្គូដថាម រឺលែករីសត (Good Time Relax Resort & Hotel) ខេត្តកំពត។

ជំនួបផ្លាស់ប្តូរពាណិជ្ជកម្មទេសចរណ៍កម្ពុជា រៀបចំធ្វើឡើងក្នុងគោលបំណងជំរុញការតភ្ជាប់កញ្ចប់ទស្សនកិច្ចទេសចរណ៍ ពីបណ្តាប្រទេសនានាមកកាន់កម្ពុជា តាមរយៈការរៀបចំឱ្យមានជំនួបផ្លាស់ប្តូរពាណិជ្ជកម្មរវាងក្រុមហ៊ុន ទេសចរណ៍ក្រៅប្រទេស ជាមួយប្រតិបត្តិករទេសចរណ៍ក្នុងស្រុក ជាពិសេសការបង្កើនកញ្ចប់ទស្សនកិច្ច ទេសចរណ៍តាមតំបន់ឆ្នេរសមុទ្រកម្ពុជា។

លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិក (PATA) ប្រាប់កម្ពុជាថ្មី នៅថ្ងៃទី ០២ ខែធ្នូ ឆ្នាំ ២០២៤ នេះថា កម្មវិធីជំនួបផ្លាស់ប្តូរពាណិជ្ជកម្មទេសចរណ៍នេះ ជាឱកាសតភ្ជាប់បណ្ដាញ ដែលគេរំពឹងថា នឹងជំរុញការតភ្ជាប់អ្នកវិនិយោគមកពីវិស័យផ្សេងៗ រួមទាំងអង្គការ សមាគមទេសចរណ៍ និងដៃគូសហការផ្សេងទៀត។ ម្យ៉ាងទៀត កម្មវិធីនេះ នឹងជំរុញគោលដៅទេសចរណ៍នៅកម្ពុជា ហើយអ្នកចូលរួមនិងមានឱកាសបង្ហាញផលិតផល សេវាកម្មទេសចរណ៍ និងបទពិសោធន៍ ទៅកាន់អតិថិជនរបស់ពួកគេ។

ក្រសួងទេសចរណ៍ និងសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) កំពុងជ្រើសរើសក្រុមហ៊ុនទេសចរណ៍ដែលជាអ្នកទិញ (Buyers) និងក្រុមអ្នកផ្សព្វផ្សាយតាមបណ្តាញសង្គម (Influencers) សំខាន់ៗចំនួន៦០ក្រុមហ៊ុន ពីប្រទេស​ឥណ្ឌូនេស៊ី ថៃ វៀតណាម សិង្ហបុរី ម៉ាឡេស៊ី ឥណ្ឌា ម៉ាឡេស៊ី រុស្ស៊ី តួកគី អ៊ីរ៉ង់ ចិន និងសហភាពអារ៉ាប់រួម រួមជាមួយ អ្នកលក់ (Sellers) ដែលជាប្រតិបត្តិករ ទេសចរណ៍ក្នុងស្រុកប្រមាណ១០០ក្រុមហ៊ុន។

កម្មវិធីនេះនឹងរៀបចំឡើងជាទម្រង់នៃជំនួបចរចាពាណិជ្ជកម្ម ទេសចរណ៍ទ្វេភាគី (B2B) រវាងអ្នកទិញ (Buyers) និងអ្នកលក់ (Sellers) ដោយមានការចុះកិច្ចសន្យា ទិញ-លក់នៅទីតាំង​ផ្ទាល់ អមជាមួយសិក្ខាសាលាផ្សព្វផ្សាយស្តីពីតម្រូវ​ការ​របស់ភ្ញៀវទេសចរជាតិ និងអន្តរជាតិ៕

អត្ថបទ៖ ឡេង ដេត