ព័ត៌មានអន្ដរជាតិ

ឥណ្ឌូណេស៊ីបញ្ចុះតម្លៃសំបុត្រយន្តហោះ ដើម្បីជំរុញទេសចរណ៍ចុងឆ្នាំ

បានផុស

៣ ខែ មុន

នៅ

ថ្ងៃអង្គារ ៣ ធ្នូ ២០២៤

ដោយ

ប្រទេសឥណ្ឌូណេស៊ី បានផ្តល់ការបញ្ចុះតម្លៃ ១០ ភាគរយ សម្រាប់សំបុត្រយន្តហោះក្នុងស្រុក អំឡុងពេលបុណ្យណូអែលឆ្នាំ ២០២៤ និងដើមឆ្នាំ ២០២៥ ដើម្បីជំរុញវិស័យទេសចរណ៍។ នេះបើតាមការចុះផ្សាយរបស់ទីភ្នាក់ងារសារ ព័ត៌មានរដ្ឋ Antara។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងដឹកជញ្ជូនឥណ្ឌូណេស៊ី លោក Elba Damhuri បានឱ្យដឹងក្នុងសេចក្តីថ្លែងការណ៍ថា ការកាត់បន្ថយថ្លៃសំបុត្រយន្តហោះ រំពឹងថានឹងអាចជួយដល់អ្នកដែលមានគម្រោងធ្វើដំណើរទៅកាន់គោលដៅនានាក្នុងស្រុក អំឡុងពេលឈប់សម្រាក ដើម្បីជំរុញទេសចរណ៍ក្នុងស្រុក និងដំណើរការសេដ្ឋកិច្ចនៅត្រីមាសចុងក្រោយនៃឆ្នាំ ២០២៤នេះ។

លោកគូសបញ្ជាក់ថា ការបញ្ចុះតម្លៃសំបុត្រយន្តហោះ នឹងអនុវត្តចាប់ពីថ្ងៃទី ១៩ ធ្នូ ២០២៤ ដល់ឆ្នាំ ថ្ងៃទី ៣ មករា ២០២៥ ខណៈអ្នកទិញសំបុត្រទុកក្នុងអំឡុងពេលបញ្ចុះតម្លៃ នឹងទទួលបានការលើកទឹកចិត្តពីក្រុមហ៊ុនអាកាសចរណ៍នៅពេលណាដែលអាចធ្វើទៅបាន។

កន្លងមក ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានស្នើឱ្យក្រសួង និងវិស័យនានាសម្របសម្រួលក្នុងការគណនាលទ្ធភាពនៃការកាត់បន្ថយថ្លៃសំបុត្រយន្តហោះនាពេលខាងមុខ ដើម្បីគាំទ្រប្រជាជន និងជំរុញសេដ្ឋកិច្ចជាតិ។ ការសម្រេចចិត្តចុងក្រោយ មិនមែនជាការគួរឱ្យភ្ញាក់ផ្អើលនោះទេ ខណៈមានការត្អូញត្អែរជាសាធារណៈអំពីតម្លៃសំបុត្រយន្តហោះខ្ពស់ក្នុងរដូវឈប់សម្រាក។

ក្រោមកិច្ចការដដែល ក្រុមហ៊ុនប្រេងរដ្ឋ Pertamina បានប្រកាសថា ខ្លួននឹងផ្តល់ការបញ្ចុះតម្លៃប្រេងឥន្ធនៈក្នុងចន្លោះពី ៧,៥-១០ ភាគរយ នៅតាមព្រលានយន្តហោះចំនួន ១៩ ទូទាំងប្រទេស ស្របតាមវិធានការកាត់បន្ថយថ្លៃសំបុត្រយន្តហោះនាពេលខាងមុខ។

បើតាម Antara ការសម្រេចចិត្តរបស់រដ្ឋាភិបាលឥណ្ឌូណេស៊ី ក៏ធ្វើឡើងដោយមើលឃើញពីគំរូរបស់ប្រទេសជិតខាងម៉ាឡេស៊ីផងដែរ ដោយគំនិតផ្តួចផ្តើមបែបនេះបានរួមចំណែកដល់កំណើនចំនួនភ្ញៀវទេសចរទាំងក្នុងស្រុក និងអន្តរជាតិរបស់ម៉ាឡេស៊ីក្នុងអំឡុងពេលថ្ងៃឈប់សម្រាក៕