ព័ត៌មានអន្ដរជាតិ

អាមេរិកប្រកាសជុំថ្មីនៃពន្ធលើបន្ទះស្រូបពន្លឺព្រះអាទិត្យពីអាស៊ីអាគ្នេយ៍

បានផុស

៧ ថ្ងៃ មុន

នៅ

ថ្ងៃអង្គារ ៣ ធ្នូ ២០២៤

ដោយ

ទីភ្នាក់ងារសារព័ត៌មានរ៉យទ័រ បានរាយការណ៍ថា ក្រសួងពាណិជ្ជកម្មអាមេរិកបានប្រកាសវិធានការពន្ធជុំថ្មី លើបន្ទះស្រូបពន្លឺព្រះអាទិត្យ ដែលនាំចូលពីប្រទេសអាស៊ីអាគ្នេយ៍ចំនួន ៤ ធំៗ ខណៈអ្នកវិភាគលើកឡើងថា ការណ៍នេះនឹងធ្វើឱ្យតម្លៃសម្រាប់អ្នកប្រើប្រាស់កើនឡើង ប៉ុន្តែកាត់បន្ថយប្រាក់ចំណេញរបស់ក្រុមហ៊ុនផលិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងពាណិជ្ជកម្ម បានប្រកាសពន្ធចន្លោះពី ២១,៣១ ភាគរយ ទៅ ២៧១,២ ភាគរយ ដោយអត្រាពន្ធនីមួយៗគឺអាស្រ័យទៅលើក្រុមហ៊ុនផលិត។ ប៉ុន្តែបើគិតតាមប្រទេសនីមួយៗ ក្រសួងកំណត់ថា ពន្ធ ២៧១,២ ភាគរយ សម្រាប់វៀតណាម ១២៥,៣៧ ភាគរយ សម្រាប់កម្ពុជា ៧៧,៨៥ ភាគរយសម្រាប់ថៃ និង ២១,៣១ សម្រាប់ម៉ាឡេស៊ី។

ពន្ធជុំថ្មីនេះ មានគោលបំណងការពារផលិតកម្មបន្ទះស្រូបពន្លឺព្រះអាទិត្យក្នុងស្រុករបស់អាមេរិក។

ជុំថ្មីនៃពន្ធនេះ ធ្វើឡើងក្រោយមានបណ្ដឹងពីក្រុមហ៊ុនផលិតបន្ទះស្រូបពន្លឺអាទិត្យនៅអាមេរិក រួមទាំងក្រុមហ៊ុនកូរ៉េខាងត្បូង Hanwha Qcells និងក្រុមហ៊ុនអាមេរិក First Solar ជុំវិញអ្វីដែលពួកគេហៅថា ការប្រកួតប្រជែងក្នុងទីផ្សារមិនស្មើភាពគ្នារបស់ក្រុមហ៊ុនចិន។

គណៈកម្មាធិការពាណិជ្ជកម្មនៃសម្ព័ន្ធអាមេរិកសម្រាប់ការផលិតបន្ទះស្រូបពន្លឺព្រះអាទិត្យ បានចោទប្រកាន់ក្រុមហ៊ុនផលិតបន្ទះស្រូបពន្លឺព្រះអាទិត្យធំៗរបស់ចិន ដែលដាក់រោងចក្រនៅក្នុងប្រទេសម៉ាឡេស៊ី កម្ពុជា វៀតណាម និងថៃ ថាបានលក់បង្ខូចតម្លៃនៅក្នុងទីផ្សារអាមេរិក ដែលធ្វើឱ្យតម្លៃដាំក្បាលចុះ។

គួរគូសបញ្ជាក់ថា បន្ទះស្រូបពន្លឺព្រះអាទិត្យដែលមាននៅលើទីផ្សារអាមេរិក រហូតដល់ ៨០ ភាគរយ គឺជាផលិតផលនាំចូលបរទេស ដោយក្នុងនោះ ថៃ កម្ពុជា ម៉ាឡេស៊ី និងវៀតណាម ក៏ជាអ្នកផ្គត់ផ្គង់ធំផងដែរ។ ត្រង់ចំណុចនេះហើយ ទើបអ្នកវិភាគបានលើកឡើងថា តម្លៃរបស់ផលិតផលប្រភេទនេះនឹងកើនឡើងសម្រាប់អ្នកប្រើប្រាស់នៅអាមេរិក។

វិធានការដដែល ក៏រំពឹងថានឹងកាត់បន្ថយប្រាក់ចំណេញរបស់ក្រុមហ៊ុនផលិតដែលនាំចូលទៅអាមេរិកផងដែរ។ ផ្ទុយទៅវិញ វានឹងជំរុញផលិតកម្មក្នុងស្រុករបស់អាមេរិក ដែលប្រតិបត្តិគោលនយោបាយការពារនិយមកាន់តែខ្លាំងទៅៗ៕