ប្រាក់ចំណូលរបស់ក្រុមហ៊ុន RMA ធ្លាក់ចុះតិចតួចនៅក្នុងត្រីមាសទី៣

នៅត្រីមាសទី៣ ឆ្នាំ២០២៤ ក្រុមហ៊ុន RMA (Cambodia) ​ បានរាយការណ៍ពីការទទួលបានចំណូលចំនួន ៣៦១,៣ប៊ីលានរៀល ថយចុះចំនួន ១,៥% បើប្រៀបធៀបទៅនឹង ត្រីមាសដូចគ្នាកាលពីឆ្នាំ២០២៣ ខណៈប្រាក់ចំណេញសម្រាប់ ត្រីមាសទី៣ មានចំនួន ១២,២ ប៊ីលានរៀល ថយចុះចំនួន ៨,២% បើប្រៀបធៀបទៅនឹង ត្រីមាសទី៣ ឆ្នាំ២០២៣។

យោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជា ទ្រព្យសកម្មសរុបនៅចុង ត្រីមាសទី៣ ឆ្នាំ២០២៤ មានចំនួន ៨៥៨,៦ ប៊ីលានរៀល ថយចុះចំនួន ២១,៥% ធៀបទៅនឹង ទ្រព្យសកម្មសរុបនាថ្ងៃទី៣១ ខែធ្នូ ឆ្នាំ២០២៣ មានចំនួន ១.០៩៣,៥ ប៊ីលានរៀល។ ទន្ទឹមនឹងនេះ បំណុលសរុបគិតត្រឹមចុង ត្រីមាសទី៣ គ.ស.២០២៤ មានចំនួន ៣៣៩,១ ប៊ីលានរៀល ថយចុះ ៤២,២% ធៀបទៅនឹង បំណុលសរុបគិតត្រឹមថ្ងៃទី៣១ ខែធ្នូ គ.ស.២០២៣ ដែលមានចំនួន ៥៨៦,៦ ប៊ីលានរៀល។

លោក Kevin Whitcraft ប្រធានក្រុមប្រឹក្សាភិបាលនៃក្រុមហ៊ុន RMA បានថ្លែងនៅ​ក្នុង​របាយការណ៍នោះ ដោយលើកឡើងអំពីសូចនាករណ៍​សេដ្ឋកិច្ច ដែលថ្មីៗនេះមិនបានផ្លាស់ប្តូធ្វើគួរឱ្យកត់សម្គាល់នោះទេ ដោយហេតុថាធនាគារពិភពលោក និងធនាគារអភិវឌ្ឍអាស៊ីនៅតែព្យាករណ៍ថាកំណើនផលិតផល ក្នុងត្រូវកសរុប (GDP) នឹងកើនឡើងដល់ចំនួន ៥,៨%ក្នុងឆ្នាំ២០២៤។

លោកថា ចក្ខុវិស័យនៃទីផ្សាររថយន្ត ទីផ្សារួមក្នុងរយៈ៩ខែដំបូងនៃឆ្នាំនេះ នៅតែមានការធ្លាក់ចុះ-៥% ធៀបនឹងរយៈពេល ដូចគ្នានៃឆ្នាំកន្លងទៅ ខណៈដែលទីផ្សាររថយន្តថ្មីមានការកើនឡើងចំនួន ៥% ។

លោកបានថ្លែងបញ្ជាក់ថា៖«មានតែក្នុងរយៈពេល ៤ ខែចុងក្រោយ នេះទេ ដែលយើងបានឃើញការលក់រថយន្តថ្មីមានការកើនឡើងកាន់តែខ្លាំង (កើនឡើង ៤២%) បើប្រៀបធៀបទៅនឹងខែដូចគ្នាកាលពីឆ្នាំមុន»។ ​

​​លោកថាសម្រាប់ប្រតិបត្តិការនៃការលក់ពីដើមឆ្នាំ២០២៤ ដល់បច្ចុប្បន្ន ក្រុមហ៊ុន RMA បានកត់ត្រាការលក់ សរុបមានការធ្លាក់ចុះចំនួន ១៦,៧% បើររៀបនឹងរយៈពេលដូចគ្នានៃឆ្នាំ២០២៣៕