សេដ្ឋកិច្ច

តម្លៃមាស មាននិន្នាការកើនឡើង នៅឆ្នាំ ២០២៥

បានផុស

៤ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

អ្នកជំនាញនៅក្នុងវិស័យហិរញ្ញវត្ថុបានអះអាងថា តម្លៃហាងឆេងមាសមាននិន្នាការកើនឡើង និងបំបែកកំណត់ត្រាថ្មី នៅឆ្នាំ ២០២៥ ដោយសារទំនុកចិត្តរបស់ប្រជាជន និងវិនិយោគិន និងបណ្ដាប្រទេសធំៗនៅលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន PP Link securities ប្រាប់កម្ពុជាថ្មីនៅថ្ងៃទី ០៤ ខែធ្នូ ឆ្នាំ ២០២៤ថា បច្ចុប្បន្នតម្លៃហាងឆេងមាសកំពុងរង់ចាំព័ត៌មានធំនៅដើមសប្ដាហ៍ខាងមុខ ពាក់ព័ន្ធនឹងកំណើនការងារនៅអាមេរិក ដែលជាសូចនាករមួយជំរុញស្ថានភាពសេដ្ឋកិច្ចអាមេរិក ដែលព័ត៌មាននេះ បង្ហាញថាស្ថានភាពការងារធ្លាក់ចុះបែបណាក៏រុញច្រានឱ្យតម្លៃហាងឆេងមាសមានការប្រែប្រួល។

បច្ចុប្បន្នតម្លៃហាងឆេងមាសកំពុងជួញដូរក្នុងតម្លៃ ២ ៦៤៣ ដុល្លារ ក្នុងមួយអោន ក្នុងទីផ្សារអន្តរជាតិ ស្មើនឹង ៣ ១៨៤ ដុល្លារ ក្នុងមួយតម្លឹងក្នុងទីផ្សារប្រទេសកម្ពុជា។ សម្រាប់តម្លៃហាងមាសនៅតាមបណ្ដាហាងនានាក្នុងរាជធានីភ្នំពេញ លក់ចេញក្នុងតម្លៃ ៣២០ ដុល្លារ ក្នុងមួយជី។

លោក ឡុង សំណាង យល់ឃើញថា៖ «តម្លៃហាងឆេងមាសនឹងមានការប្រែប្រួលខ្លាំងនៅចុងខែ ១២ និងខែមករា ឆ្នាំ ២០២៥ គឺពាក់ព័ន្ធនឹងការឡើងកាន់ដំណែងរបស់លោក ដូណាល់ ត្រាំ ដែលគាត់នឹងអាចលើកឡើងពាក់ព័ន្ធនឹងការដំឡើងពន្ធទៅលើប្រទេសមួយចំនួន និងការរឹតបន្តឹងវិនិយោគិននៅអាមេរិក ក៏ដូចជាចង់ឱ្យវិនិយោគិនធំៗ ទៅរកស៊ីនៅសហរដ្ឋអាមេរិក»។

បើតាម លោក ឡុង សំណាង លោកដូណាល់ ត្រាំអាចនឹងលើកជុំវិញបញ្ហាភូមិសាស្ត្រនយោបាយ សង្គ្រាម ស្ថានភាពសេដ្ឋកិច្ចលើពិភពលោក ហើយនឹងអាចមានសង្គ្រាមពាណិជ្ជកម្មដែលអ្នកវិនិយោគកំពុងព្រួយបារម្ភ ក្នុងអាណត្តិរបស់លោក ត្រាំ។

លោក ឡុង សំណាង បញ្ជាក់ថា៖ «ប្រសិនបើការឡើងកាន់ដំណែងរបស់លោក ដូណាល់ ត្រាំ ធ្វើឱ្យសេដ្ឋកិច្ចអាមេរិកល្អប្រសើរឡើង តម្លៃមាសអាចនឹងធ្លាក់ចុះ ប៉ុន្តែអាចនឹងមិនមានការសហការពីដៃគូដែលពាក់ព័ន្ធ ក៏អាចតម្លៃមាសស្ទុះឡើងដែរ»។

អ្នកជំនាញរូបនេះ អះអាងថា ទំនុកចិត្តរបស់ពិភពលោក សំដៅទៅលើទំនុកចិត្តរបស់ប្រជាជនធម្មតា ក៏ដូចជាវិនិយោគិនធំៗ មួយចំនួន ឬក៏បណ្ដាធនាគារលើពិភពលោក នៅតែមានទំនុកចិត្តទៅលើតម្លៃមាស ដោយសារពួកគាត់នៅតែបន្ត ទិញមាសដើម្បីការពារហានិភ័យ។

លោក ឡុង សំណាងអះអាងថា៖ «ប្រទេសធំៗនៅលើពិភពលោកនៅតែមានទំនុកចិត្តលើតម្លៃហាងឆេងមាសដដែល ព្រោះពួកគាត់នៅតែបន្តទិញមាស ឬរក្សាទុកមាសដើម្បីការពារហានិភ័យណាមួយ អញ្ចឹងតម្លៃហាងឆេងមាសនៅពេលខាងមុខនៅតែឡើងដដែល ជាក់ស្ដែងនៅពេលនេះ ដែលយើងមើលឃើញថា តាំងពីខែ១ រហូតដល់ខែ ១២ ក្នុងឆ្នាំ ២០២៤ តម្លៃហាងឆេងមាសឡើងរហូត ហើយអាចនឹងបំបែកកំណត់ត្រានៅឆ្នាំ ២០២៥»៕

អត្ថបទ៖ ឡេង ដេត