ស្ថាប័នរដ្ឋពីរចាប់ដៃគ្នាក្នុងផ្តល់សេវាហិរញ្ញវត្ថុ​ដល់ម្ចាស់សហគ្រាសនានា

ក្រសួងពាណិជ្ជកម្មរួមសហការជាមួយធនាគារអភិវឌ្ឍន៍ជនបទ និងកសិកម្ម (ARDB)​ ដើម្បីចូលរួមអភិវឌ្ឍន៍វិស័យកសិកម្ម វិស័យពាណិជ្ជកម្ម និងជំរុញការប្រើប្រាស់ផលិតផល និងសេវារបស់គូភាគី ជាពិសេសផ្តល់នូវសេវាហិរញ្ញវត្ថុដល់ម្ចាស់សហគ្រាស ឬអាជីវករឱ្យ​កាន់តែមានភាពងាយ​ស្រួលនៅពេលដែលពួកគេធ្វើការចុះបញ្ជីឬប្រើសេវានានារបស់ក្រសួង។

កាលពីព្រឹកថ្ងៃអង្គារ ទី៣ ខែធ្នូ ឆ្នាំ២០២៤ លោកស្រី តឹក រ៉េតកំរ៉ង រដ្ឋលេខាធិកា នៃ​ក្រសួងពាណិជ្ជកម្ម និង​ លោក កៅ ថាច អគ្គនាយក ARDB បានចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការភាពជាដៃគូ​ក្រោមអធិបតីភាពលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម។ ​

បើយោងតាមក្រសួង៖« អនុស្សរណៈនៃការយោគយល់គ្នានេះ ធ្វើឡើងក្នុងគោលបំណងជំរុញភាពជាដៃគូតាមរយៈការភ្ជាប់កិច្ចសហប្រតិបត្តិការលើការអភិវឌ្ឍវិស័យកសិកម្ម វិស័យពាណិជ្ជកម្ម និងជំរុញការប្រើប្រាស់ផលិតផល និងសេវារបស់គូភាគី ដោយផ្តោតលើការអនុវត្តច្បាប់ស្តីពីប្រតិបត្តិការដែលមានកិច្ចធានា ការផ្តល់ទិន្នន័យសន្ទស្សន៍ថ្លៃទំនិញក្នុងទីផ្សារ ការគាំទ្រការកែច្នៃផលិតផលក្នុងស្រុក និងការនាំចេញ តាមរយៈការផ្តល់ហិរញ្ញប្បទានដែលមានអត្រាការប្រាក់សមរម្យ»។

លោក កៅ ថាច អគ្គនាយកនៃ ARDB បានថ្លែងប្រាប់កម្ពុជាថ្មីនៅព្រឹកថ្ងៃទី៤ ខែវិច្ឆិកានេះថា ជាមួយនឹងភាពជាដៃគូរនេះ យើងនឹងចូលរួមជំរុញការចុះបញ្ជីអាជីវកម្មនានាដែលអាចធានាលើទ្រព្យនានា​ និងមួយទៀតយើងនឹងចូលរួមគាំទ្រដល់គម្រោងជំរុញទីផ្សារសម្រាប់កសិកម្មខ្នាតតូច (AIMS) និងទី៣ការប្រើប្រាស់សេវាធនាគារតាមរយៈQR កូដជាដើម។

លោកថា៖«ការសហការនេះគឺដើម្បីជួយក្រសួងក្នុងការអនុវត្តគម្រោងរួមសំដៅធ្វើយ៉ាងណា​បង្ករភាពងាយស្រួលដល់បណ្តាប្រតិបត្តិករឬអាជីវករ​នានា»៕