ព័ត៌មានអន្ដរជាតិ

អាមេរិក និងអង់គ្លេស បង្រ្កាបលើបណ្ដាញលាងលុយសកលនៅ ៣០ ប្រទេស ដែលរុស្ស៊ីប្រើ

បានផុស

៤ ខែ មុន

នៅ

ថ្ងៃព្រហស្បតិ៍ ៥ ធ្នូ ២០២៤

ដោយ

សហរដ្ឋអាមេរិក និងអង់គ្លេស បានប្រកាសកាលពីថ្ងៃពុធថា ខ្លួនបានបង្រ្កាបលើបណ្តាញលាងលុយកខ្វក់សកល ដែលពួកមហាសេដ្ឋីរុស្ស៊ីប្រើប្រាស់ដើម្បីគេចចេញពីការដាក់ទណ្ឌកម្ម និងដែលលាងលុយឱ្យក្រុមអ្នកជួញដូរគ្រឿងញៀន ឧក្រិដ្ឋជន និងចារកម្មជាដើម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារប្រឆាំងឧក្រិដ្ឋកម្មជាតិរបស់ចក្រភពអង់គ្លេស (NCA) បាននិយាយថា កិច្ចខិតខំប្រឹងប្រែងអនុវត្តច្បាប់ដែលសម្របសម្រួលជាអន្តរជាតិ និងមានឈ្មោះកូដប្រតិបត្តិការថា «Operation Destabilise» បានបង្រ្កាបដល់បណ្ដាញលាងលុយ ដែលគ្រប់ដណ្ដប់លើប្រទេសចំនួន ៣០ នៅទូទាំងពិភពលោក។

NCA បន្តថា ប្រតិបត្តិការដដែល ក៏មានការចូលរួមផងដែរពីអាជ្ញាធរក្នុងប្រទេសបារាំង អៀរឡង់ និងអារ៉ាប់រួម។ រហូតមកដល់ពេលនេះ ប្រតិបត្តិការបាននាំឱ្យមានការចាប់ខ្លួន មនុស្សចំនួន ៨៤ នាក់ និងការរឹបអូសប្រាក់សុទ្ធ និងលុយគ្រីបតូ សរុបជាង ២៥ លានដុល្លារ។

បណ្តាញលាងលុយ មាននៅចក្រភពអង់គ្លេស អឺរ៉ុបដីគោក មជ្ឈិមបូព៌ា និងអាមេរិកខាងត្បូង ដោយគាំទ្រឧក្រិដ្ឋកម្មធ្ងន់ធ្ងរ និងការរៀបចំឧក្រិដ្ឋកម្មផ្សេងៗ នៅជុំវិញពិភពលោក។

ចំណែកឯក្រសួងរតនាគារសហរដ្ឋអាមេរិកវិញ បាននិយាយថា ខ្លួនបានដាក់ទណ្ឌកម្មលើបុគ្គល និងអង្គភាពនៃបណ្ដាញឧក្រិដ្ឋជនដែលបានជួយឥស្សរជនរុស្ស៊ីឱ្យប្រើប្រាស់លុយគ្រីបតូ ដើម្បីគេចពីទណ្ឌកម្មរបស់លោកខាងលិច ដែលដាក់ចេញក្រោយរុស្ស៊ីចូលឈ្លានពានអ៊ុយក្រែនទ្រង់ទ្រាយធំ នៅខែកុម្ភៈ ឆ្នាំ ២០២២។

បណ្ដាញឧក្រិដ្ឋជនធំៗ២ ដែលមានឈ្មោះថា «TGR Group» និង «Smart» ថែមទាំងបានជួយបុគ្គលរងទណ្ឌកម្មរុស្ស៊ី ឱ្យអាចចូលប្រើប្រាស់ប្រព័ន្ធហិរញ្ញវត្ថុអន្តរជាតិទៀតផង។

NCA បាននិយាយថា បណ្តាញ Smart ត្រូវបានប្រើប្រាស់ដើម្បីផ្តល់ហិរញ្ញប្បទានដល់សកម្មភាពចារកម្មរុស្ស៊ីនាពេលកន្លងមក។ ទាំងបណ្តាញ Smart និង TGR សុទ្ធតែពឹងផ្អែកយ៉ាងខ្លាំងលើគ្រីបតូ ដើម្បីជួយសម្រួលដល់ប្រតិបត្តិការរបស់ខ្លួន។

NCA បានពន្យល់ថា ក្រុមឧក្រិដ្ឋជននៅរុស្ស៊ីដែលប្រើប្រាស់លុយគ្រីបតូ អាចទាក់ទងជាមួយក្រុមឧក្រិដ្ឋជនគ្រឿងញៀននៅទីតាំងផ្សេងទៀត ដែលមានលុយស្មើគ្នាជាសាច់ប្រាក់។ បន្ទាប់មកទៀត បណ្តាញទាំងនោះនឹងរៀបចំលុយគ្រីបតូឱ្យក្រុមឧក្រិដ្ឋជនជាថ្នូរនឹងសាច់ប្រាក់។ ប្រាក់ទាំងនោះ ក្រោយមកនឹងត្រូវគេយកទៅលាង តាមរយៈអាជីវកម្មធំៗ ដូចជាក្រុមហ៊ុនសំណង់ជាដើម។ ក្រោយពីការដោះដូរនោះ ក្រុមគ្រឿងញៀនអាចប្រើលុយគ្រីបតូ ដើម្បីទិញថ្នាំញៀន ឬអាវុធបន្ថែមទៀត ដោយមិនចាំបាច់ផ្ទេរលុយសុទ្ធឆ្លងដែន៕