សេដ្ឋកិច្ច

គម្រោងសាងសង់វារីអគ្គិសនី នៅខេត្តកោះកុងអានុភាព ១៧០ មេហ្កាវាត់ រំពឹងផ្ដល់ថាមពលស្អាតនៅរយៈពេល ៣ ឆ្នាំខាងមុខ

បានផុស

១ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

លោក កែវ រតនៈ រដ្ឋមន្ត្រីក្រសួងរ៉ែ និងថាមពលនៅថ្ងៃទី ០៩ ខែធ្នូ ឆ្នាំ ២០២៤ បានចូលរួមពិធីបិទស្ទឹងវាលថ្មកំបុត និងឫស្សីជ្រុំកណ្តាល ដើម្បីសាងសង់វារីអគ្គិសនីដែលមានអនុភាព១៧០មេហ្កាវាត់នៅខេត្តកោះកុង ដោយក្តីរំពឹងថា គម្រោងថាមពលស្អាតនេះនឹងផ្តល់អគ្គិសនីដល់បណ្តាញអគ្គិសនីជាតិនៅឆ្នាំ២០២៧ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រតនៈ ថ្លែងថា កម្ពុជាប្តេជ្ញាបង្កើតថាមពលស្អាតឱ្យបានយ៉ាងតិច៧០%នៅឆ្នាំ២០៣០ ដែលជាអត្រាខ្ពស់សម្រាប់ទប់ស្កាត់ការប្រើប្រាស់ប្រភពដូចជាធ្យូងថ្ម និងប្រេង ហើយថាមពលបៃតងក៏នឹងបន្តជួយទាក់ទាញការវិយោគពីក្រៅប្រទេសមកកម្ពុជាបន្ថែមទៀតដែរ។

គម្រោងសាងសង់វារីអគ្គិសនីស្ទឹងឫស្សីជ្រុំកណ្តាល និងគម្រោងសាងសង់វារីអគ្គិសនីវាលថ្មកំបុតរបស់ក្រុមហ៊ុនKHMER ELECTRICAL POWER CO., LTD នៅស្រុកថ្មបាំង ខេត្តកោះកុង ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជាក្នុងទំហំទុនវិនិយោគប្រមាណ ៤៤៧,៥ លានដុល្លារ កាលពីថ្ងៃទី ២១ ខែវិច្ឆិកា ឆ្នាំ២០២៣។

ក្នុងនោះគម្រោងសាងសង់វារីអគ្គិសនីស្ទឹងឫស្សីជ្រុំកណ្តាល មានអានុភាព ៧០មេហ្កាវាត់ នៅស្រុកមណ្ឌលសីមា និងគម្រោងសាងសង់វារីអគ្គិសនីវាលថ្មកំបុត អានុភាព ១០០មេហ្កាវាត់ នៅស្រុកថ្មបាំង ខេត្តកោះកុង តាមរូបភាពសាងសង់, អាជីវកម្ម, និងផ្ទេរ (BOT) ដែលអាចបង្កើតការងារបានចំនួន ២៣០កន្លែង៕