ព័ត៌មានអន្ដរជាតិ

តម្លៃមាសលើទីផ្សារអន្តរជាតិ កើនជាង១ភាគរយ កាលពីថ្ងៃចន្ទ

បានផុស

២ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

តម្លៃមាសជួញដូរលើទីផ្សារអន្តរជាតិ បានកើនឡើងជាង១ភាគរយ សម្រាប់ការជួញដូរកាលពីថ្ងៃចន្ទ ដោយសារតែធនាគារកណ្ដាលចិនចាប់ផ្ដើមទិញឡើងវិញ ការដួលរលំនៃរដ្ឋាភិបាលស៊ីរី និងការរំពឹងដែលថាធនាគារកណ្ដាលអាមេរិកនឹងកាត់បន្ថយអត្រាការប្រាក់បន្ថែមទៀត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសដុំ បានកើនឡើង ១,១ ភាគរយ ដោយជួញដូរនៅតម្លៃ ២ ៦៦២,៩៨ ដុល្លារ/អោន ខណៈតម្លៃមាសនាពេលអនាគតរបស់អាមេរិក បានបញ្ចប់ការជួញដូរខ្ពស់ជាង ១ ភាគរយ នៅតម្លៃ ២ ៦៨៥,៥ ដុល្លារ/អោន។

កំណើនតម្លៃនេះ កើតឡើងក្រោយធនគារកណ្ដាលរបស់ចិន ដែលជាប្រទេសទិញមាសច្រើនបំផុតមួយរបស់ពិភពលោក ប្រកាសពីចាប់ផ្ដើមទិញមាសឡើងវិញ ក្រោយផ្អាកអស់រយៈពេល៦ខែរួចមក។ អ្នកវិភាគលើកឡើងថា ការប្រកាសនេះធ្វើឱ្យទីផ្សារមាសសង្ឈឹមថា ធនាគារកណ្ដាលនៃប្រទេសផ្សេងៗទៀតនឹងបោះជំហានតាម។

ជាមួយគ្នានោះ វាក៏ពាក់ព័ន្ធផងដែរទៅនឹងការផ្ដួលរំលំរដ្ឋាភិបាលស៊ីរី ដែលធ្វើឱ្យជម្លោះនៅមជ្ឈិមបូព៌ាបន្តស្ថិតក្នុងភាពស្រពិចស្រពិលនៃការឆ្ពោះទៅរកសន្តិភាព ដែលវានឹងជួយជំរុញតម្រូវការមាស។

បន្ថែមពីនេះផងដែរ ពាណិជ្ជករកំពុងរំពឹងទុកថា ធនាគារកណ្ដាលអាមេរិកនឹងកាត់បន្ថយអត្រាការប្រាក់ ២៥ ភាគរយ បន្ថែមទៀត។ នេះបើយោងតាមរ៉យទ័រ។

រាប់តាំងពីដើមឆ្នាំមក តម្លៃមាសបានកើនឡើងជិត ២៩ ភាគរយ ទោះបីជាធ្លាក់ចុះប្រហែល៥ភាគរយ ក្រោយលោក ដូណាល់ ត្រាំ ជាប់ឆ្នោតប្រធានាធិបតីអាមេរិកជាថ្មីក៏ដោយ៕