ពាណិជ្ជកម្មទ្វេភាគីកម្ពុជា-វៀតណាម សម្រេចបានទឹកប្រាក់ជាង $៧ ពាន់លាននៅរយៈពេល ១១ ខែ ឆ្នាំនេះ

នៅក្នុងរយៈពេល ១១ ខែ ចាប់ពីខែមករា ដល់ខែវិច្ឆិកា ឆ្នាំ ២០២៤ ការដោះដូពាណិជ្ជ​កម្ម​ទ្វេ​ភា​គី​​កម្ពុជា-វៀតណាមសម្រេចបាន​ទឹកប្រាក់​ជាង ៧ ពាន់លានដុល្លារ កើនឡើងពី ៥,៨៧ ពាន់​លាន​​ដុល្លារក្នុងរយៈពេលដូចគ្នា នៅឆ្នាំ ២០២៣ ស្មើនឹង ២០,៦ ភាគរយ។ នេះបើយោង​តាមអគ្គ​នា​​យកដ្ឋាន​គយ និងរដ្ឋាករកម្ពុជា​(GDCE)។

ទិន្នន័យរបស់ GDCE បានបង្ហាញថា ជាមួយនឹងទំហំនៃការនាំចេញ-នាំចូលរវាងប្រទេសទាំងពីរ ក្នុងនោះ កម្ពុជា​នាំចេញ​ទៅ​វៀត​ណាម​មានទំហំទឹកប្រាក់ប្រមាណជិត ៣,៣០ ពាន់លានដុល្លារ កើនឡើង ២៦,៣ ភាគរយ និងវៀតណាមនាំចូលមកកម្ពុជា មានទំហំទឹកប្រាក់ ៣,៧៩ ពាន់​លាន​​ដុល្លារ កើនកើន ១៦ ភាគរយ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីនៅថ្ងៃទី ១២ ខែធ្នូ ឆ្នាំ ២០២៤ នេះថា បច្ចេកទេសដាំដុះរបស់កម្ពុជាមានភាពល្អប្រសើរជាងមុន ហើយការសម្រួល​ទៅលើ​របាំងពាណិជ្ជកម្ម តាមច្រកព្រំដែន ទៅលើនិតិវិធីក្នុងការនាំចេញកសិផលទៅវៀត​ណាមក៏​អាចជួយ​ក្នុងការពន្លឿនការនាំចេញផលិតផលកសិផលកម្ពុជាទៅវៀតណាម។

លោក ឡោ វិចិត្រ យល់ឃើញថា៖«សេដ្ឋកិច្ចរបស់វៀតណាមមានកំណើន បានជំរុញឱ្យមានតម្រូវ​ការខ្ពស់ជាងមុន អញ្ចឹងតម្លៃកសិកផលរបស់យើងមានភាពប្រកួតប្រជែង អញ្ចឹងពេលខ្លះវៀត​ណាម​​គាត់​ទិញពីយើងជាជាងគាត់ដាំដុះខ្លួនឯង»។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្មមានប្រសាសន៍កាលពីពេលថ្មីៗនេះថា ពា​ណិជ្ជ​​កម្មទ្វេ​ភា​គី​​រវាង​កម្ពុជា-វៀត​ណាម មានភាពល្អប្រសើរ ប្រទាក់ក្រឡា​ និងស៊ីជម្រៅ។

លោក បញ្ជាក់ថា កម្ពុជា និងវៀតណាម អាចនាំចេញផលិតផលមួយចំនួន លើសពីការ​ផ្តល់ឱ្យគ្នា​ទៅវិញទៅមក ក្រោមក្របខ័ណ្ឌកិច្ចព្រមព្រៀងស្តីពី​ពាណិជ្ជកម្មទំនិញ​អាស៊ាន តាមរយៈ​កិច្ច​សម្រប​​​​សម្រួល​ជំរុញ​ពាណិជ្ជកម្មទ្វេភាគីកម្ពុជា-វៀតណាម ដែលត្រូវបានចុះហត្ថលេខាផ្លូវការ​ជាទៀង​ទាត់​ក្នុងរយៈពេល២ឆ្នាំម្តង។

ផលិតផល​សំខាន់ៗ ​ដែល​កម្ពុជា នាំទៅ​វៀតណាម រួមមាន​ដូចជា ស្រូវ​ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ចំណែក​វៀតណាម​នាំមក​វិញ មានដូចជា សម្ភារ​សំណង់ គ្រឿង​ម៉ាស៊ីន ប្រេងឥន្ធនៈ ខ​បក​រណ៍​អេឡិចត្រូនិក​-​អគ្គិសនី ជី​កសិកម្ម គ្រឿងទេស និង​បន្លែ ផ្លែឈើ ជាដើម​៕

អត្ថបទ៖ ឡេង ដេត