តម្លៃមាសហក់ឡើងជាថ្មី នៅមុនពេលអាមេរិកត្រៀមទម្លាក់អត្រាកាប្រាក់

មាសបានបង្កើនតម្លៃខ្លួនជាថ្មីនៅក្នុងសប្ដាហ៍នេះ ដោយសារព្រឹត្តិការណ៍សង្គ្រាមនៅស៊ីរី និងព័ត៌​មានធនាគារកណ្ដាលអាមេរិក​ត្រៀម​ទម្លាក់​​​អត្រាការ។ ​នេះបើតាមការអះអាងរបស់អ្នក​ជំនាញនៅ​ក្នុងវិស័យ​ហិ​រញ្ញ​វត្ថុ។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities​ ប្រាប់​​កម្ពុជាថ្មីនៅថ្ងៃទី ១២ ខែធ្នូ ឆ្នាំ ២០២៤ នេះថា មានកត្តាពីរធំៗ​បានរុញច្រានឱ្យតម្លៃមាស​កើនឡើង ទី១ សង្គ្រាមនៅស៊ីរី ដែលបានបិទបញ្ចប់កាលពីសប្ដាហ៍មុន បានធ្វើឱ្យប៉ះពាល់​ទៅ​ដល់​​ស្ថានភាពសេដ្ឋកិច្ចលើពិភពលោក ទី២ ព័ត៌មានអំពីការដំឡើង ទម្លាក់ ឬរក្សាទុកអត្រា​ការ​ប្រាក់ ខណៈភាគរយនៃការកាត់បន្ថយអត្រាការប្រាក់ខ្ពស់។

លោក ឡុង សំណាង យល់ថា៖ «ភាគរយនៃការកាត់អត្រាការប្រាក់ច្រើន ដោយសារអត្រាការ​ប្រាក់​បច្ចុប្បន្នគឺស្ថិតនៅ ៤.៧៥ អញ្ចឹងគោលដៅរបស់ធានគារកណ្ដាល​អាមេរិកនឹងកាត់បន្ថយ​បន្ថែមទៀត ដើម្បីទាញវិនិយោគិនចូលទៅក្នុងស្រុក ប្រសិនបើលុយដុល្លារថ្លៃ វិនិយោគគិនក្រៅពីជនជាតិអាមេរិក ឬជនជាតិអាមេរិកខ្លួនតែម្ដង គឺអាចនឹងប៉ះពាល់ពាក់ព័ន្ធនឹងដើមទុនពួកគាត់យកចូលទៅវិនិយោគ»។

អ្នកស្រី ជុត គីមសែ អាជីវករលក់មាសនៅផ្សារធំថ្មី ប្រាប់ថា សកម្មភាពទិញ-លក់មាស មានភាពស្ងប់ស្ងាត់មួយរយៈកន្លងមកនេះ ដោយសារហាងឆេងមាសប្រែប្រួលឡើងចុះច្រើន ធ្វើឱ្យអតិថិជនភ័យបារម្ភ។

នៅថ្ងៃទី ១២ ខែធ្នូ ឆ្នាំ ២០២៤ តម្លៃហាងឆេងមាសកំពុងជួញដូរក្នុងតម្លៃ ២ ៧០៨ ដុល្លារ ក្នុង​មួយអោន  ក្នុងទីផ្សារ​អន្តរ​ជាតិ ស្មើនឹង ៣ ២៦០ ដុល្លារ ក្នុងមួយតម្លឹងនៅ​ក្នុងប្រទេស​កម្ពុជា។ សម្រាប់តម្លៃមាសនៅតាមបណ្ដាហាងនានាក្នុងរាជធានីភ្នំពេញលក់ចេញក្នុងតម្លៃ ៣២៥ ដុល្លារ​ក្នុងមួយជី៕

អត្ថបទ៖ ឡេង ដេត