ក្រុមហ៊ុនអន្តរជាតិ ២៣ ចូលរួមដាក់ស្ដង់ពិព័រណ៍ពាណិជ្ជកម្មកម្ពុជា

ក្រុមហ៊ុនបរទេសចំនួន ២៣ បានចូលរួមដាក់ស្ដង់ពិព័រណ៍ពាណិជ្ជកម្មកម្ពុជា (CTE) ដែល​ក្រ​សួង​​ពាណិជ្ជកម្មបានរៀបចំរយៈពេល ៤ ថ្ងៃ ចាប់ពីថ្ងៃទី ១៣ ដល់ថ្ងៃទី ១៦ ខែធ្នូ ឆ្នាំ ២០​២៤​ ដែលបានបង្ហាញអំពីការចាប់អារម្មណ៍របស់បណ្តាប្រទេសនានានៅក្នុងតំបន់ និងសកលលោកក្នុងការមកតាំងបង្ហាញនូវផលិតផលរបស់ខ្លួនក៏ដូចជាឱកាសនៃការស្វែងរកដៃគូរពាណិជ្ជកម្មក្នុងស្រុកដើម្បីពង្រីកអាជីវកម្ពុជារបស់ខ្លួននៅកម្ពុជាផងដែរ។

ពិព័រណ៍ពាណិជ្ជកម្មកម្ពុជា រៀបចំធ្វើឡើង​ក្នុងគោលបំណងតាំងបង្ហាញផលិតផល​មានគុណភាព​ខ្ពស់របស់កម្ពុជា ទំនិញនាំចេញ-នាំចូលសំខាន់ៗ និងសេវាកម្មដែលមានលក្ខណៈពិសេស របស់​បណ្តា​អ្នកផ្គត់ផ្គង់ជុំវិញពិភព​លោក​។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្មមានប្រសាសន៍ថា នៅក្នុង​ព្រឹត្តិការណ៍​ពិព័រណ៍​ពាណិជ្ជកម្មកម្ពុជា ក្រសួង​ពាណិជ្ជកម្មបានសម្របសម្រួលជូនក្រុម​ហ៊ុនសហគ្រាស ធុនតូច និង​មធ្យម សហគមន៍ សហព័ន្ធ ក្រសួងស្ថាប័ន ស្ថានទូត សរុបចំនួន ១៦៦ ក្នុងនោះមាន ២៣ ជា​ក្រុមហ៊ុនបរទេស និងស្ថានទូត សរុបស្ដង់ចំនួន ២៤៦ ស្ដង់ ដែលមាន ៤១ ស្ដង់ជាទំនិញ​នាំចូល និងសេវាកម្មមកពីបរទេសមកពីប្រទេសឥណ្ឌូនេស៊ី ចិន ថៃ វៀតណាម ម៉ាឡេស៊ី សិង្ហបុរី សាធារ​ណ​រដ្ឋកូរ៉េ ឥណ្ឌា អូស្ត្រាលី និងប៉ាគីស្ថាន។

ពិព័រណ៍ពាណិជ្ជកម្មកម្ពុជា ឆ្នាំ ២០២៤ នឹងដាក់បង្ហាញផលិតផលជាច្រើនរួមមាន ផលិតផល​សម្រាប់​ការនាំចេញរបស់កម្ពុជា ផលិតផលកម្មន្តសាល ផលិតផលសិប្បកម្ម ផលិតផលកសិកម្ម និងសេវាកម្ម។

ក្រៅពីនេះ ក៏មានការតាំងបង្ហាញផលិតផល និងលក់ទំនិញ, វេទិកាពាណិជ្ជកម្មឌីជីថលលើកទី១ និងពិព័ណ៍អនឡាញ វេទិកាពាណិជ្ជកម្ម និងវិនិយោគកម្ពុជា-កូរ៉េ កម្មវិធីជំនូបពាណិជ្ជកម្មស្ដីពី​​ការអភិវឌ្ឍទីផ្សារផលិតផលសក្ដានុពលកម្ពុជា វេទិកាស្ដីពីការនាំចេញរបស់កម្ពុជា។

គិតត្រឹមរយៈពេល ១១ ខែ ឆ្នាំ ២០២៤ ទំហំពាណិជ្ជកម្មកម្ពុជា-អន្តរជាតិសម្រេចបានទឹកប្រាក់ប្រមាណ ៥០,៤៥ ប៊ីលានដុល្លារអាមេរិក ក្នុងនោះការនាំចេញប្រមាណ ២៤,៣៤ ប៊ីលានដុល្លារ កើនឡើង ១៤,៣៦% និងការនាំចូល ២៦,១ ប៊ីលានដុល្លារ កើនឡើង ១៧,៤៧% ធៀបនឹងរយៈពេលដូចគ្នាក្នុងឆ្នាំ ២០២៣៕

អត្ថបទ៖ ឡេង ដេត