កម្ពុជាទទួលបានភ្ញៀវអន្តរជាតិ ៦ លាននាក់ ក្នុងរយៈពេល ១១ ខែ ឆ្នាំ ២០២៤

នៅក្នុងរយៈពេល ១១ ខែ ឆ្នាំ ២០២៤ កម្ពុជាទទួលបានភ្ញៀវទេសចរណ៍​អន្តរជាតិចំនួន​ប្រមាណ ៦ លានានក់ កើនឡើង ២២ ភាគរយ ធៀបនឹង​រយៈពេល​ដូច​គ្នានៅឆ្នាំ​២០២៣។ នេះបើយោង​តាម​របាយ​​ការណ៍​របស់​ក្រសួងទេសចរណ៍។

លោក ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍នៅក្នុងពិធីបុណ្យសមុទ្រលើកទី ១១ នៅខេត្តកំពត នៅថ្ងៃទី ១៣ ខែធ្នូ ឆ្នាំ ២០២៤ ថា៖ «ក្នុងរយៈពេល ១១ ខែ ឆ្នាំ ២០២៤ កម្ពុជាទទួលបានទេសចរអន្តរជាតិសរុបប្រមាណ ៦ លាននាក់ កើន ២២% និងទេសចរជាតិ​បានធ្វើដំណើរកម្សាន្តនៅទូទាំងប្រទេសប្រមាណ ២០ លាននាក់ កើនឡើង ១៩,៧% ក្នុង​​នោះ​​តំបន់ឆ្នេរសមុទ្រមានទេសចរជាតិប្រមាណ ៨ លាននាក់ កើន ១២,៥% និងទេសចរបរទេស​ប្រមាណ ៤២ ម៉ឺននាក់ កើន ១០,៦% ធៀបនឹងរយៈពេលដូចគ្នាកាលពីឆ្នាំ ២០២៣»។

លោករដ្ឋមន្ត្រីទេសចរអះអាងថា នៅដំណាច់ឆ្នាំ ២០២៤​កម្ពុជារំពឹងទទួលបានភ្ញៀវទេសចរណ៍​អន្តរជាតិប្រមាណ ៦,៧ លាននាក់ ពោលគឺលើសមុនពេលជំងឺកូវីដ១៩ និងទេសចរជាតិ​ប្រមាណ​​ ២២ លាននាក់។

តាមរយៈការដាក់ចេញនូវគោលនយោបាយត្រឹមត្រូវរបស់រាជរដ្ឋាភិបាល ផែនការយុទ្ធសាស្ត្រ និងវិធានការអន្តរាគមន៍នានា និងការប្ដេជ្ញាចិត្ត ក្នុងការចូលរួមពីអន្តរក្រសួងស្ថាប័ន និងភាគី​ពាក់ព័ន្ធ បានបង្ហាញថា អភិក្រមជវភាពនៃប្រព័ន្ធតួអង្គតែមួយបានក្លាយ​ជាកម្លាំង​ចលករក្នុង​ការជំរុញវិស័យទេសចរកម្ពុជាឱ្យងើបឡើងវិញ និងកំពុងវិល​ត្រឡប់ទៅរកស្ថាន​ភាពដូចមុន​វិបត្តិកូវីដ១៩។

សូមជំរាបថា បុណ្យសមុទ្រលើកទី១១ នៅខេត្តកំពតនៅឆ្នាំនេះ រៀបចំពិធីបើកក្រោម​អធិបតីសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលមានរៀបចំកម្មវិធី​សំ​ខាន់ជាច្រើនរួមមាន៖

ការតាំងពិព័រណ៍សមិទ្ធិផលមហោស្រពម្ហូបអាហារ និងភេសជ្ជៈ ការតាំងពិព័រណ៍ពាណិជ្ជកម្ម ផលិតផលក្នុងស្រុក និងក្រៅស្រុក និងគម្រោងអភិវឌ្ឍតំបន់ឆ្នេរ ព្រមទាំងការសម្ដែងសីល្បៈ និងកម្មវិធីព្រឹត្តិការណ៍អមជាច្រើនផ្សេងទៀត៕

អត្ថបទ៖ ឡេង ដេត