ក្រុមហ៊ុនកូរ៉េ ចុះសិក្សាបង្កើតរោងចក្រកែច្នៃគ្រាប់ស្វាយចន្ទី នៅខេត្តកំពង់ធំ

ក្រុមហ៊ុនកូរ៉េ​នៅថ្ងៃទី ១៩ ខែធ្នូ ឆ្នាំ ២០២៤ នេះ បានចុះសិក្សាទីតាំង បង្កើត​រោងចក្រ ស្វាយ​ចន្ទី​នៅ​ក្នុងខេត្តកំពង់ធំ ដើម្បីកែច្នៃនាំចេញ ស្របពេលដែលរាជរដ្ឋាភិបាលកម្ពុជាបានកំណត់នូវចក្ខុវិស័យក្នុងការប្រែក្លាយកម្ពុជាជាអធិរាជស្វាយចន្ទីនៅលើទីផ្សារពិភពលោកក្នុងរយៈពេលប៉ុន្មានឆ្នាំខាងមុខនេះ។

គណៈប្រតិភូកូរ៉េបានចុះទៅខេត្តកំពង់ធំនៅថ្ងៃទី ១៩ ខែធ្នូនេះ ដើម្បីសិក្សាស្វែងយល់អំ​ពីខ្សែច្រ​វាក់​ផលិតកម្ម គ្រាប់ស្វាយចន្ទី និងពិនិត្យរោងចក្រ Mirath Agri Tech ព្រមទាំងពិនិត្យ​ទីតាំង​សាង​សង់​រោងចក្រនៅតំបន់សេដ្ឋកិច្ចពិសេសរបស់រដ្ឋ និងសហគមន៍​ស្វាយចន្ទី។

លោក អួន ស៊ី ឡុត ប្រធានសមាគមស្វាយចន្ទីកម្ពុជា បានឱ្យដឹងថា ក្រុមហ៊ុនកូរ៉េចំនួន ៤ ក្នុង​នោះមាន ២ ក្រុមហ៊ុន ចុះសិក្សាលទ្ធភាពបង្កើតរោងចក្រ និង២ ទៀតជាក្រុមហ៊ុន​ទិញគ្រាប់​ឆៅ​។ ក្រុមហ៊ុនទិញមិនទាន់បានព្រមព្រៀងគ្នាទេ ដោយសារបញ្ហាទូទាត់តាម Letter of Credit។ ចំណែក​ឯកក្រុមហ៊ុន ២ ទៀត នឹងចុះសិក្សានៅថ្ងៃទី ២៧ ខែ ធ្នូនេះ។

រាជរដ្ឋាភិបាលកំពុងផ្ដោតលើការ លើកកម្ពស់ឧស្សាហកម្មកែច្នៃ ​តាម​រយៈការជំរុញឱ្យមាន​ការវិនិ​យោគ​​​លើកសិផលដែលមានសក្ដានុពល ​ក្នុងនោះដំណាំស្វាយចន្ទី​ក៏ជា​ដំណាំអាទិភាព។

លោក តូច ប៊ុនហ៊ួ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទមានប្រសាសន៍ថា បច្ចុប្បន្ន​​ផលិតកម្មកែច្នៃគ្រាប់ស្វាយចន្ទីនៅក្នុងស្រុកសម្រេចបាន ១២ ភាគរយ ដែលជាចំនួនតិច​តូចនៅ​ឡើយ ក្រៅពីនេះ គឺកម្ពុជានាំគ្រាប់ស្វាយចន្ទីឆៅ​ចេញទៅក្រៅ​ប្រទេស ដែលធ្វើ​ឱ្យយើង​បាត់​បង់តម្លៃបន្ថែម និងកម្លាំងពលកម្មក្នុងស្រុកយ៉ាងច្រើន។​

រាជរដ្ឋាភិបាលកំពុងជំរុញឱ្យស្ថាប័នពាក់ព័ន្ធ ​និងដៃគូអភិវឌ្ឍ​ស្វែងរកដៃគូវិនិយោគទាំងក្នុង និង​ក្រៅ​ស្រុកបន្ថែមទៀត ដើម្បីកែច្នែគ្រាប់​ស្វាយចន្ទី​ឱ្យ​សម្រេចបានលើសគោលដៅ ២៥% ស្រប​តាម​កម្មវីធី «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» ដើម្បីក្លាយ​ទៅ​ជាអធិរាជស្វាយចន្ទី។

យោងតាមសមាគមស្វាយចន្ទីកម្ពុជា នៅក្នុងរយៈពេល ១១ខែ ឆ្នាំ ២០២៤ កម្ពុជាផលិតគ្រាប់ស្វាយចន្ទីបានចំនួន ៨៥ ម៉ឺនតោន (៨៥០ ០០០) កើនឡើង២៦.៨% ក្នុងនោះនាំចេញទៅក្រៅប្រទេសចំនួនជាង ៨១ ម៉ឺនតោន (៨១៥ ០០០) គិតជាទឹកប្រាក់ ១,១៥០ ពាន់លានដុល្លារ កើនឡើង៣១%។

កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា ក្នុងនោះ​ខេត្ត​ចំនួន ៣ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា។ នេះបើតាមក្រសួងកសិកម្ម រុក្ខាប្រមាញ់ និងនេសាទ៕

អត្ថបទ៖ ឡេង ដេត