ព័ត៌មានអន្ដរជាតិ

វៀតណាមគ្រោងចេញច្បាប់ ហាមឃាត់អ្នកជំពាក់ពន្ធលើសពី ២ ០០០ ដុល្លារ មិនឱ្យចេញពីប្រទេស

បានផុស

២២ វិនាទី មុន

នៅ

ថ្ងៃចន្ទ ២៣ ធ្នូ ២០២៤

ដោយ

ក្រសួងហិរញ្ញវត្ថុវៀតណាម បានស្នើចេញច្បាប់ហាមឃាត់បុគ្គល ឬម្ចាស់អាជីវកម្ម ដែលជំពាក់ពន្ធលើសពី ៥០ លានដុង (ប្រហែល ២ ០០០ ដុល្លារអាមេរិក) មិនឱ្យចាកចេញពីប្រទេស។ នេះបើតាមការចុះផ្សាយរបស់កាសែត VnExpress ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធាននាយកដ្ឋានច្បាប់នៃក្រសួងហិរញ្ញវត្ថុ លោក Hoang Thai Son បាននិយាយក្នុងកិច្ចប្រជុំមួយកាលពីថ្ងៃសុក្រថា មានមនុស្សប្រហែល ៨១ ០០០ នាក់ ដែលជំពាក់ពន្ធ ៥០ លានដុង ឬច្រើនជាងនេះ នៅទូទាំងប្រទេស។ លោកបានបន្តថា ចំនួនដែលបានស្នើឡើង គឺស្របនឹងកម្រិតដែលប្រទេសមួយចំនួនផ្សេងទៀតបានអនុវត្ត។

នៅក្រោមសំណើច្បាប់នេះ បុគ្គលដែលប្រឈមនឹងការហាមឃាត់ការធ្វើដំណើរ នឹងទទួលបានការជូនដំណឹងតាមប្រព័ន្ធអេឡិចត្រូនិកដោយអាជ្ញាធរពន្ធដារ ឬរាយបញ្ជី នៅលើគេហទំព័រផ្លូវការរបស់អាជ្ញាធរ។ ប្រសិនបើបំណុលនៅតែមិនទាន់សង ៣០ ថ្ងៃបន្ទាប់ពីការព្រមាន អាជ្ញាធរនឹងអនុវត្តច្បាប់ហាមឃាត់នេះ។

បច្ចុប្បន្ន វៀតណាមមានបុគ្គលចំនួន ៦ ៥០០ នាក់ ដែលត្រូវបានហាមឃាត់ឱ្យចាកចេញពីប្រទេស ដែលសារតែជំពាក់ពន្ធ ដោយកើនឡើង ៣ ដង ធៀបនឹងឆ្នាំមុន។

ក្រសួងហិរញ្ញវត្ថុបាននិយាយថា ប្រទេសជាច្រើនដូចជាចិន ម៉ាឡេស៊ី និងសហរដ្ឋអាមេរិក ក៏បានដាក់បម្រាមការធ្វើដំណើរលើបុគ្គលដែលមានបំណុលពន្ធច្រើន និងហួសកាលកំណត់ផងដែរ៕