ព័ត៌មានអន្ដរជាតិ

ចិនគ្រោងអនុវត្តផែនការ «សកម្មភាព៣ឆ្នាំ» ដើម្បីជំរុញការប្រើប្រាស់ក្នុងស្រុក

បានផុស

៣ ខែ មុន

នៅ

ថ្ងៃអង្គារ ២៤ ធ្នូ ២០២៤

ដោយ

រដ្ឋបាលរដ្ឋសម្រាប់បទប្បញ្ញត្តិទីផ្សារចិន បានប្រកាសកាលពីថ្ងៃចន្ទថា ខ្លួននឹងអនុវត្តផែនការសកម្មភាពរយៈពេល ៣ ឆ្នាំដើម្បី «បង្កើនប្រសិទ្ធភាពបរិយាកាសអ្នកប្រើប្រាស់» ដោយចាប់ផ្ដើមវានៅឆ្នាំក្រោយ ដែលជាផ្នែកមួយនៃកិច្ចខិតខំប្រឹងប្រែងក្នុងការជំរុញការប្រើប្រាស់ក្នុងស្រុក។ នេះបើតាមការចុះផ្សាយរបស់ភ្នាក់ងារព័ត៌មានរដ្ឋ Xinhua។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយតករទីផ្សារកំពូលប្រចាំប្រទេសដដែល ក៏បានឱ្យដឹងផងដែរថា ខ្លួននឹងធ្វើឱ្យប្រសើរឡើងនូវប្រព័ន្ធដំណើរការរបាយការណ៍ និងដោះស្រាយបញ្ហា ក្នុងវិស័យអ្នកប្រើប្រាស់ប្រកបដោយប្រសិទ្ធភាព។ និយតករមានបំណងលើកកម្ពស់ហាងលក់ទំនិញទូទៅ ទីផ្សារ ហាងទំនិញអនឡាញ ភោជនីយដ្ឋាន និងកន្លែងទេសចរណ៍ផ្សេងៗ នៅឆ្នាំក្រោយ។

Xinhua មិនបានផ្សាយលម្អិតពីផែនការសកម្ម ៣ ឆ្នាំនោះទេ។ ទិន្នន័យពីការិយាល័យស្ថិតិជាតិ បង្ហាញថា ក្នុងរយៈពេល ១១ ខែដំបូងនៃឆ្នាំ ២០២៤ ការលក់រាយទំនិញប្រើប្រាស់របស់ប្រទេស មានចំនួន ៤៤,៣ ទ្រីលានយន់ (ប្រហែល ៦,១៦ ទ្រីលានដុល្លារ) កើនឡើង ៣,៥ ភាគរយ ក្នុងអត្រាប្រចាំឆ្នាំ ខណៈការលក់រាយតាមអ៊ិនធឺណិតនៃទំនិញប្រើប្រាស់សរុបមាន ចំនួនប្រមាណ ១៤ ទ្រីលានយន់ កើនឡើង ៧,៤ ភាគរយ។

ទោះជាយ៉ាងណាក៏ដោយ ការប្រកាសរបស់និយតករចិន ធ្វើឡើងចំពេលដែលសេដ្ឋកិច្ចរបស់ប្រទេសកំពុងបន្តស្ថិតនៅក្នុងស្ថានភាពស្រពិចស្រពិល ដោយសារតែការជាប់គាំងនៃវិបត្តិអចលនទ្រព្យ និងកម្សោយនៃតម្រូវការប្រើប្រាស់ក្នុងស្រុក ដែលបន្តអូសបន្លាយ ហើយធ្វើឱ្យការរឹតត្បឹតប្រាក់របស់ពលរដ្ឋកើនឡើង ខណៈការវិនិយោគធ្លាក់ចុះ។

គេមើលឃើញថា ដោយសារតែបញ្ហានេះ រដ្ឋាភិបាលចិនបានដាក់ចេញនូវគោលនយោបាយជំរុញសេដ្ឋកិច្ចផ្សេងៗ ក្នុងនោះរួមមានទាំងយុទ្ធសាស្រ្តជំរុញការប្រើប្រាស់ក្នុងស្រុក ដែលគេចាត់ទុកថាជា កត្តានាំមុខក្នុងកំណើនសេដ្ឋកិច្ចរបស់ប្រទេស៕