ព័ត៌មានអន្ដរជាតិ

ចិនអនុម័តគម្រោងសាងសង់ទំនប់វារីអគ្គិសនីធំជាងគេបំផុតលើពិភពលោក នៅតំបន់ទីបេ

បានផុស

១៦ វិនាទី មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

រដ្ឋាភិបាលចិនបានអនុម័តលើគម្រោងសាងសង់ទំនប់វារីអគ្គិសនីដ៏ធំបំផុតរបស់ពិភពលោក នៅគែមភាគខាងកើតនៃតំបន់ខ្ពង់រាបទីបេ ទោះបីមានការព្រួយបារម្ភថាវាអាចប៉ះពាល់ដល់មនុស្សរាប់លាននាក់ ជាពិសេសនៅផ្នែងខាងក្រោមនៃខ្សែទឹកក្នុងប្រទេសឥណ្ឌា និងបង់ក្លាដែស ក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំបន់វារីអគ្គិសនីដ៏ធំមហិមានេះ មានទីតាំងពីផ្នែកខាងក្រោមបំផុតនៃទន្លេ Yarlung Zangbo ក្នុងប្រទេសចិន ហើយតាមការប៉ាន់ស្មានរបស់ក្រុមហ៊ុន Power Construction Corp នៃប្រទេសចិនក្នុងឆ្នាំ ២០២០ វាមានសមត្ថភាពផលិតអគ្គិសនីបានប្រមាណ ៣០០ ប៊ីលានគីឡូវ៉ាត់ម៉ោង/ឆ្នាំ។ ទំហំនេះ ធំជាងដល់ទៅ៣ដង នៃសមត្ថភាពរបស់ទំបន់វារីអគ្គិសនី Three Gorges Dam (៨៨,២ ប៊ីលានគីឡូវ៉ាត់ម៉ោង/ឆ្នាំ) ភាគកណ្ដាលនៃប្រទេសចិន ដែលបច្ចុប្បន្នជាទំនប់វារីអគ្គិសនីដ៏ធំរបស់សកល។

ទីភ្នាក់ងារព័ត៌មានរដ្ឋចិន Xinhua បានរាយការណ៍កាលពីថ្ងៃពុធថា គម្រោងទំបន់វារីអគ្គិសនីដដែល នឹងដើរតួយ៉ាងសំខាន់ក្នុងការបំពេញតាមគោលដៅកាបូន និងអព្យាក្រឹតកាបូនរបស់ប្រទេសចិន ជំរុញឧស្សាហកម្មពាក់ព័ន្ធដូចជាវិស្វកម្ម និងបង្កើតការងារនៅក្នុងតំបន់ទីបេ។ អ្វីដែលគួរឱ្យចាប់អារម្មណ៍ខ្លាំងបំផុតមួយនោះ គឺថា ទីតាំងភូមិសាស្រ្តនៃទំនប់ ដោយចំណុចមួយនៃទន្លេ Yarlung Zangbo បានធ្លាក់ចុះខ្លាំងកម្ពស់ ២ ០០០ ម៉ែត្រ ត្រឹមតែរយៈចម្ងាយ ៥០ គីឡូម៉ែត្រ ដែលនេះអាចផ្តល់នូវសក្តានុពលវារីអគ្គិសនីដ៏ធំ រួមជាមួយបញ្ហាប្រឈមផ្នែកវិស្វកម្មផ្សេងៗ។

ទំហំនៃការវិនិយោគនៃគម្រោងទាំងមូល អាចនឹងកើនលើស ១ ទ្រីលានយន់ (១៣៧ ប៊ីលានដុល្លារ) ដោយរាប់ទាំងការចំណាយផ្នែកវិស្វកម្ម និងលើសតម្លៃសាងសង់ទំនប់ Three Gorges Dam ដែលត្រូវចំណាយប្រមាណ ៣៤,៨ ប៊ីលានដុល្លារ។

យ៉ាងណាមិញ អាជ្ញាធរចិនមិនបានបញ្ជាក់ទេ ថាតើមានប្រជាជនប៉ុន្មាននាក់ ដែលរងផលប៉ះពាល់ ហើយត្រូវផ្លាស់ទីលំនៅចេញ និងពីផលប៉ះពាល់ជាក់លាក់លើប្រព័ន្ធអេកូឡូស៊ីក្នុងតំបន់។ ប៉ុន្តែមន្រ្តីចិនធ្លាប់អះអាងថា គម្រោងយក្សដដែលនឹងមិនប៉ះពាល់ធ្ងន់ធ្ងរដល់បរិស្ថាន ឬការផ្គត់ផ្គង់ទឹកនៅផ្នែកខាងក្រោមនៃទន្លេនោះទេ។

ទោះបីជាយ៉ាងណាក៏ដោយ កន្លងមក ប្រទេសឥណ្ឌា និងបង់ក្លាដែស បានសម្ដែងការព្រួយបារម្ភអំពីទំនប់វារីអគ្គិសនីរបស់ចិន ដោយលើកឡើងថា គម្រោងនេះអាចធ្វើឱ្យបរិស្ថានវិទ្យាក្នុងតំបន់ លំហូរ និងផ្លូវទឹកខាងក្រោមទំបន់ មានការប្រែប្រួល។ ទន្លេ Yarlung Zangbo ហូរចាក់ទៅក្នុងឈូងសមុទ្របេងហ្គាល់ ដោយឆ្លងកាត់ឥណ្ឌា និងបង់ក្លាដែស ដែលឱ្យឈ្មោះវាថា ទន្លេព្រហ្មបុត្រ (Brahmaputra)។