ព័ត៌មានអន្ដរជាតិ

Agoda៖ វៀតណាមក្លាយជាទិសដៅទេសចរណ៍ឆ្លងឆ្នាំដ៏ពេញនិយមមួយ សម្រាប់ភ្ញៀវអន្តរជាតិ

បានផុស

៣ ខែ មុន

នៅ

ថ្ងៃសុក្រ ២៧ ធ្នូ ២០២៤

ដោយ

គេហទំព័រភ្នាក់ងារដំណើរកម្សាន្តអន្តរជាតិ Agoda បានឱ្យដឹងថា វៀតណាមក្លាយជាទិសដៅទេសចរណ៍សម្រាប់ការឆ្លងឆ្នាំដ៏ពេញនិយមបំផុតមួយសម្រាប់ភ្ញៀវទេសចរអន្តរជាតិ ដោយការស្វែងរកកន្លែងស្នាក់នៅក្នុងប្រទេសនេះបានកើនឡើង ៣០ ភាគរយ ធៀបនឹងឆ្នាំមុន។ នេះបើតាមការចុះផ្សាយរបស់កាសែតវៀតណាម The Investor។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Agoda បានបន្តថា ទីក្រុងហូជីមិញគឺជាគោលដៅពេញនិយមបំផុតនៅវៀតណាម ដោយភ្ញៀវទេសចរអាចប្រារព្ធការឆ្លងចូលឆ្នាំ ២០២៥ ដោយមើលការបាញ់កាំជ្រួចលើទន្លេសៃហ្គនជាដើម។ ភ្នាក់ងារដដែលបន្តថា ភ្ញៀវទេសចរមកពីកូរ៉េខាងត្បូង ជប៉ុន ថៃ តៃវ៉ាន់ និងសហរដ្ឋអាមេរិក នាំមុខគេលើគោលដៅសម្រាប់ក្រុងនេះ។

គិតតែក្នុងទិសដៅវៀតណាម កោះ Phu Quoc (កោះត្រល់) បានហក់ឡើងដល់ចំណាត់ថ្នាក់លេខ ២ កើនឡើងពីលេខ ៥ កាលពីឆ្នាំមុន ខណៈក្រុង ដាណាង រដ្ឋធានី ហាណូយ និង ញ៉ាត្រាង ឈរនៅលើចំណាក់ថ្នាក់គោលដៅសំខាន់ៗទាំង៥។

លោក Lam Vu ប្រធាន Agoda ប្រចាំវៀតណាម បាននិយាយថា ប្រជាប្រិយភាពរបស់វៀតណាមដែលកំពុងកើនឡើងក្លាយជាទិសដៅថ្ងៃចូលឆ្នាំសកល ឆ្លុះបញ្ចាំងពីភាពទាក់ទាញរបស់ប្រទេស ដែលរួមបញ្ចូលគ្នានៃវប្បធម៌ ភាពរស់រវើក និងសម្រស់ធម្មជាតិ។

បើតាម Agoda ក្រៅពីវៀតណាម គោលដៅឆ្លងឆ្នាំសកលសម្រាប់ភ្ញៀវទេសចរអន្តរជាតិដ៏ពេញនិយមផ្សេងៗទៀត រួមមានទីក្រុងបាងកក (ថៃ) តៃប៉ិ (តៃវ៉ាន់) តូក្យូ (ជប៉ុន) សិង្ហបុរី និងក្រុងហុងកុង។

គួរគូសបញ្ជាក់ថា ក្នុងឱកាសឆ្លងឆ្នាំសកល ២០២៤ វៀតណាមបានទទួលស្វាគមភ្ញៀវទេសចរអន្តរជាតិ ចំនួន ៣,២ លាននាក់។ ក្នុងរយៈពេល ១១ ខែដើមឆ្នាំនេះ វៀតណាមបានទទួល ១៥,៨ លាននាក់ កើនឡើងជាង ៤០ ភាគរយ ក្នុងអត្រាប្រចាំឆ្នាំ៕