ត្រីប្រហុកចាប់ផ្ដើមត្រូវម្ដងទៀត ចាប់ពីថ្ងៃនេះ

ត្រីសម្រាប់ធ្វើប្រហុក និងផ្អក នឹងចាប់ផ្ដើមត្រូវម្ដងទៀត ចាប់ពីថ្ងៃទី ០២ រហូតដល់ថ្ងៃទី ១០ ខែមករា ឆ្នាំ ២០២៥ ខណៈអាជ្ញាធរអំពាវនាវដល់ប្រជាពលរដ្ឋដែលមានបំណងចង់ធ្វើប្រហុករួសរាន់ទៅទិញត្រីតាមពេលវេលា និងទីកន្លែង។

រដ្ឋបាលជលផល បានប្រកាសថា៖ «ក្នុងរដូវនេសាទឆ្នាំ ២០២៤-២០២៥ តាមការសង្កេត បន្ទាប់ពីខ្នើតខែមិគសិរកន្លងមកនេះ ត្រីក៏បន្តបន្លាស់ទីចេញពីបឹង ទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាបនៅក្នុងភូមិសាស្ត្រខេត្តកណ្តាល និងរាជធានីភ្នំពេញ ចាប់ពីថ្ងៃព្រហស្បតិ៍ ៤ កើត ដល់ថ្ងៃទស្រុក ១២ កើត ខែបុស្ស ត្រូវនឹងថ្ងៃទី ២ ដល់ថ្ងៃទិ ១០ ខែមករា ឆ្នាំ ២០២៥ ក្នុងករណីមេឃស្រឡះ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង»។

រដ្ឋបាលជលផលក៏បានអំពាវនាដល់ប្រជាពលរដ្ឋ ដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី រួសរាន់មកទិញត្រីតាមពេលវេលា និងទីន្លែងដែលបានជំរាបជួន។

យោងតាមរដ្ឋបាលជលផល នៅក្នុងឆ្នាំ ២០២៤ ផលនេសាទ និងវារីវប្បកម្មកម្ពុជាសម្រេចបានសរុបចំនួន ៩២៦ ៩៣៤តោន កើនឡើង ៦០ ៦៨៤តោន ស្មើនឹង៧ ភាគរយ បើ​ធៀប​​ទៅនឹង ឆ្នាំ២០២៣។ 

ក្នុងនោះ ផលនេសាទទឹកសាបទទួលបាន ៤៦៧ ៣៤៤តោន ផល​នេសាទ​សមុទ្រទទួល​បាន ១៣៩ ៣១០តោន និងផលវារីវប្បកម្ម ៣២០ ២៨០តោន៕