អ្នកអភិវឌ្ឍគាំទ្រចំណាត់ការ សម្រួលឱ្យអតិថិជនដែលបង់រំលស់ជាមួយម្ចាស់បុរី ផ្ទេរបំណុលទៅគ្រឹះស្ថានធនាគារ

អ្នកឧកញ៉ាបណ្ឌិត​ សំ សុខនឿន ប្រធានសម្ព័ន្ធក្រុមហ៊ុន SAM SN Group បានគាំទ្រចំណាត់​ការ​ស​ម្របសម្រួល​ឱ្យអតិ​​ថិជនដែលបានបង់រំលស់ផ្ទះជាមួយម្ចាស់បុរី ក្នុងអត្រាការប្រាក់ខ្ពស់ អាច​អាច​​​ផ្ទេរកម្ចីនេះទៅជាមួយគ្រឹះស្ថានធនាគារ និងហិរញ្ញវត្ថុវិញ ក្នុងអត្រាការប្រាក់ទាបជាង។

អ្នកឧកញ៉ាបានលើកឡើងបន្ទាប់ពីក្រសួងរៀបចំដែនដី នគរូបនីយកម្ម និងសំណង់ និងធនាគារជាតិនៃកម្ពុជា រួមជាមួយនឹង វិស័យអចលនទ្រព្យ និងតំណាងគ្រឹះស្ថាន​ធនាគារ ​និងហិរញ្ញវត្ថុ នៅថ្ងៃទី ០៣ មករា បានបើកកិច្ចប្រជុំរួមគ្នាមួយ ដើម្បីសម្របសម្រួល​ជាមួយភាគីពាក់ព័ន្ធ ឲ្យអតិថិជនដែលបានទទួលកម្ចីពីម្ចាស់បុរី ក្នុងតម្លៃខ្ពស់ អាចផ្ទេរបំណុល​ទៅជាមួយគ្រឹះស្ថានធនាគារ និងហិរញ្ញវត្ថុវិញ ក្នុងអត្រាការប្រាក់ទាបជាង។

អ្នកឧកញ៉ា សំ សុខនឿន ប្រាប់កម្ពុជាថ្មីនៅថ្ងៃទី ០៦ ខែមករា ឆ្នាំ ២០២៥នេះថា៖« កន្លងមក ម្ចាស់​គម្រោងមួយចំនួន មិនមានថវិកាសាងសង់បញ្ចប់គម្រោងរបស់គាត់បានដោយរលូនទេ ប៉ុន្តែ​អ្នក​ទិញមួយចំនួនធំ គឺទិញដោយធ្វើការបង់រំលស់ទៅខាងម្ចាស់គម្រោង ខណៈ​ការ​បង់​រំលស់​តិចៗ មិន​អាចឱ្យម្ចាស់គម្រោងមាន​លុយគ្រប់គ្រាន់​ដើម្បីយក​ទៅសាងសង់​បញ្ចប់​គម្រោង​ទេ»។

អ្នកឧកញ៉ា សំ សុខនឿន បានបញ្ជាក់ថា សម្រាប់គម្រោងណា ដែលម្ចាស់គម្រោងមានលុយ គ្រប់​គ្រាន់ គាត់អាចបញ្ចប់គម្រោងនោះបាន ប៉ុន្តែប្រសិនបើ គម្រោងនោះ មិនមានសាច់ប្រាក់គ្រប់​គ្រាន់​ដើម្បីបញ្ចប់គម្រោងទេ គឺលុយដែល​ទទួលបានពីការទិញពីអតិថិជន ដែលបង់រំលស់​ប្រចាំខែ ឬក៏គម្រោងមួយចំនួនទៀត គាត់លក់​បានតិច ហើយអតិថិជនរបស់គាត់​មិនបង់​រំលស់​ថែមទៀត គឺគាត់មិនមានសាច់​ប្រាក់​ដើម្បីធ្វើការបញ្ចប់គម្រោងទេ។

អ្នកឧកញ៉ា សំ សុខនឿន បន្ថែមថា៖ «កាលណាគាត់មិនអាចបញ្ចប់គម្រោងបានល្អ អញ្ចឹង​គាត់មិនអាចប្រគល់ផ្ទះ ទៅឱ្យអ្នកទិញបានទាន់ពេលវេលា តាមកុងត្រានោះទេ។ អញ្ចឹង​ហើយ​បានជា​មានភាពជាប់គាំងមួយរយៈចុងក្រោយនេះ ជាប់គាំងនេះ គឺថា ម្ចាស់​គម្រោង​មិន​មានលុយគ្រប់គ្រាន់ក្នុងការសាងសង់បញ្ចប់»។

ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ០៣ ខែមករា ឆ្នាំ ២០២៥ បានរៀបចំកិច្ចពិភាក្សាមួយជាមួយវិស័យអចលនទ្រព្យ និងតំណាងគ្រឹះស្ថានធនាគារ និងហិរញ្ញវត្ថុ ដើម្បីសម្របសម្រួលជាមួយភាគីពាក់ព័ន្ធឲ្យអតិថិជនដែលបានទទួលកម្ចីពីម្ចាស់បុរី ក្នុងតម្លៃខ្ពស់ អាចផ្ទេរកម្ចីនេះទៅជាមួយគ្រឹះស្ថានធនាគារ និងហិរញ្ញវត្ថុវិញ ក្នុងអត្រាការប្រាក់ទាបជាង។

លោកស្រី ជា សិរី អគ្គទេសាភិបាល ធនាគារជាតិនៃកម្ពុជា មានប្រសាសន៍ថា៖ «កិច្ចសម្របសម្រួលនេះនឹងជួយម្ចាស់បុរីដែលជាប់គាំងទុនបង្វិល បានថវិកាដុំមកវិញដើម្បីបន្តការអភិវឌ្ឍរបស់ពួកគាត់ ហើយក៏នឹងជួយអតិថិជនឲ្យទទួលបានឥណទានផ្ទះពីគ្រឹះស្ថានធនាគារ ដែលជាទូទៅមានការប្រាក់ទាបជាង និងមានរយៈពេលយូរជាងរហូតដល់ ២៥ឆ្នាំ ឬ ៣០ឆ្នាំ»។

អ្នកឧកញ៉ា សំ សុខនឿន បានបញ្ជាក់បន្ថែមថា បញ្ហាមួយទៀត គឺអ្នកទិញគាត់​គ្មានលទ្ធភាព​ក្នុងការបបង់ ដោយសារតែគាត់ជួប​បញ្ហាហិរញ្ញវត្ថុ​មួយចំនួន ពីមុនធ្លាប់បង់ ១ ០០០ ដុល្លារ ក្នុងមួយខែ ឥឡូវគាត់អត់មានលុយបង់ ១ ០០០ ដុល្លារ ក្នុងមួយខែទេ ហើយម្ចាស់គម្រោង​អត់ទទួលបានលុយហ្នឹង អញ្ចឹងមានភាពជាប់គាំងជាមួយគ្នា។

អ្នកឧកញ៉ាបណ្ឌិត សំ សុខនឿន បញ្ជាក់ថា ប្រសិនបើប្រព័ន្ធធនាគារ និងហិរញ្ញវត្ថុ សម្រប​សម្រួល ដើម្បីផ្ដល់កម្ចីដល់អតិថិជន ដូច្នេះអតិថិជន ពេលដែលគាត់មានលុយហើយ គាត់​បង់​ផ្ដាច់ទៅឱ្យម្ចាស់គម្រោង ហើយម្ចាស់គម្រោងអាចបន្តបញ្ចប់ការសាងសង់។ ហើយនៅ​ពេល​ដែលគាត់អាចសាសង់បាន គឺគាត់អាចសាងសង់ផ្ទះ ប្រគល់ទៅឱ្យ​ដល់អ្នក​ទិញបាន អញ្ចឹង​គម្រោង​ដែលជាប់គាំងគឺដើរវិញហើយ។

សូមជំរាបថា កាលពីពេលកន្លងទៅថ្មីៗនេះ គ្រឹះស្ថានធនាគារ និងហិរញ្ញវត្ថុ ក៏បានគាំទ្រ​គំនិតផ្តួចផ្តើម ក្នុង​ការ​បន្ធូរបន្ថយការប្រាក់លើកម្ចីសម្រាប់ការអភិវឌ្ឍលំនៅឋាន និងទិញ​អចលនទ្រព្យ មកត្រឹម ៨% ក្នុងមួយឆ្នាំ ដែលអត្រាការប្រាក់ថ្មីនេះ នឹងផ្តល់ឱ្យអតិថិជន ទិញលំនៅឋាននូវ​លទ្ធភាព​អនុវត្ត​កាតព្វកិច្ចសងត្រឡប់ កាន់តែមានភាពងាយស្រួល។

លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជា មានប្រសាសន៍ថា៖ «កម្ចីនៅក្នុងវិស័យអចលនទ្រព្យប្រមាណ ១០% ខណៈនៅប៉ុន្មានឆ្នាំចុងក្រោយនេះ មានការថមថយបន្តិច ឥឡូវនេះសមតុល្យសរុបជាង ១ ពាន់ លាន អញ្ចឹងសម្រាប់វិស័យ​អចលនទ្រព្យមានប្រមាណជិត ១០០ លានដុល្លារ អត្រាការប្រាក់ ៨% ក្នុងមួយឆ្នាំ មិន​មែន​ជារឿងដែលពិបាកនោះទេ គឺធនាគារអាចទទួលយកបានមិនមានបញ្ហានោះទេ»។

លោក តូច ចៅចេក ស្វាគមន៍ និងសហការតាមអនុសាសន៍របស់ទេសាភិបាល​ធនាគារជាតិ​ពិភាក្សាមួយរដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់។

យោង​តាម​ ធនាគារជាតិកម្ពុជា គិតត្រឹមខែតុលា ឆ្នាំ២០២៤ ឥណទានផ្តល់​ដោយគ្រឹះ​ស្ថានធនាគារ និងហិរញ្ញវត្ថុទៅក្នុង​វិស័យ​អចល​នទ្រព្យមានប្រមាណ ៦,២០ ពាន់លានដុល្លារ ឬស្មើនឹង ១០%​នៃទំហំឥណទាន​ជាង ៦១​​ ​ពាន់លានដុល្លារ មានកំណើន ១៧,៨% ធៀប​នឹង​រយៈពេលដូចគ្នា កាលពីឆ្នាំមុន។

ការផ្តល់ឥណទានពីគ្រឹះស្ថានធនាគារ ក្នុង​វិស័យ​សំណង់ មាន​ចំនួនសរុបប្រមាណ ៧,៣០ ពាន់លានដុល្លារ កើនឡើង ៣៣,៣ ភាគរយ៕

អត្ថបទ៖ ឡេង ដេត